जिल्ला प्रशासन कार्यालय मोरङले बुधबार नै सार्वजनिक स्थानमा भिडभाड नगर्न गर अटेर गरे संक्रमण रोग निवारण ऐन २०२० अनुसार कारवाही गर्ने चेतावनी दिएको छ । तर बुधबार उद्योगीसँग होली खेल्न पुगेका मुख्यमन्त्री राई बिहीबार विराटनगरका व्यापारीहरुको संगठन विराट व्यापार संघले आयोजना गरेको होली सुभकामना आदान प्रदान कार्यक्रममा सहभागि भएका हुन् ।
मुख्यमन्त्रीसँगै प्रदेश सरसकारका उद्योग पर्यटन वन तथा वातावरण मन्त्री जगदिश कुसियत पनि होली खेल्न पुगेका थिए । संघीय सरकारको गृह मन्त्रालय र स्वास्थ्य मन्त्रालयले कोरोनको जोखिम बढेको भन्दै स्वास्थ्य सतर्कता अपनाउन, भिडभाड नगरी घरभित्रै बसेर होली मनाउन आग्रह गरेको छ ।
जिल्ला सुरक्षा समितिले होलीमा भिडभाड नगर्न आग्रह गर्दै अटेर गरे कारवाही गर्ने चेतावनी दिएको थियो । प्रशासनले सर्वसाधारणलाई आग्रह गरिरहँदा मुख्यमन्त्री राई भने मानेका छैनन् ।
‘मुख्यमन्त्री नै होलीको सार्वजनिक कार्यक्रममा सहभागि भएपछि सर्वसाधारणलाई आग्रह गर्दा नैतिक संकट पर्यो,’ जिल्ला प्रशासन कार्यालय स्रोत भन्छ,‘ जोखिम बढेका बेला भिडभाड गर्न हुदैन् ।’
सुरक्षा समितिको बैठक र सीसीएमसीको निर्णय अनुसार प्रहरीले बजारमा माइकिङ गर्दै सार्वजनिक रुपमा होली नखेल्न आग्रह गरिरहेको छ । पछिल्लो एकसातामा विराटनगरमा मात्रै १८ जना कोरोना सङ्क्रमित भेटिएका छन् । सङ्क्रमितको ट्राभल हिस्ट्री भारतसँग जोडिएको छ ।
