काठमाडौँ, / १ सय ११ औं अन्तराष्ट्रिय महिला दिवस, सोमबार बिभिन्न कार्यक्रमको आयोजना गरि मनाइएको छ ।
हरेक वर्ष मार्च ८ तारिखलाई विश्वभर लैङ्गीक समानता र न्यायको पक्षमा वकालत गर्दै महिला दिवसको रुपमा मनाईन्छ । नेपालमा पनि यस दिन नारी दिवसको रुपमा विविध कार्यक्रम गरेर मनाउने गरिएको छ । यस पटकको महिला दिवसको नारा ‘महिला नेतृत्व : कोभिड १९ सँगै समान भविष्यको प्राप्ती’ भन्ने रहेको छ ।
दिवसका अवसरमा बिभिन्न संघ संगठनहरुले कार्यक्रमको आयोजना गरेको थियो । यसै क्रममा पूर्व अनेरास्ववीयुले काठमाडौंको माइतिघरमा सडक नाटक लगाएत रचनात्मक कार्यक्रम गरेको थियो ।
कार्यक्रममा अनेरास्ववीयुका पूर्व अध्यक्ष नविना लामाले नेपाल समाज रुपान्तरणको बाटोमा अघि बढेपछि महिला र पुरुषबीच कायम रहेको भेदभावलाई अन्त्य गर्नुपर्ने बताउनुभयो ।
समाजमा सुरक्षित भविष्य र समानताको लागि विभिन्न अभियानहरु चलिरहेका छन् । तरपनि नेपाली समाजमा महिलाहरुले यथोचित स्थान हाँसिल गर्न पाएका छैनन् । अझैपनि घरेलु वा पारिवारिक हिंसामा महिलाहरुमाथि दमन, विभेद र अत्याचार भईरहेको छ ।
