नेपालगञ्ज । भोटेकोशी बाढीबाट प्रभावित तथा पीडित परिवारका लागि बाँकेका निजी विद्यालय र अस्पतालहरूले रु. एक करोड २५ लाखभन्दा बढी आर्थिक सहयोग गरेका छन् ।
बाँकेमा सञ्चालित निजी तथा आवासीय विद्यालय (प्याब्सन) र निजी अस्पतालहरूले बाढीपीडितको उद्धार तथा राहतका लागि उक्त रकम सहयोग गरेका हुन् । प्याब्सन बाँकेमा आबद्ध निजी विद्यालयहरूले रु. ६५ लाखभन्दा बढी तथा निजी अस्पतालहरूले रु. ६० लाख ७८ हजार ५ सय १३ सहयोग गरेका छन् ।
प्याब्सन बाँकेका अध्यक्ष विकास बज्राचार्यका अनुसार जिल्लाका ७७ निजी तथा आवासीय विद्यालयबाट बाढीपीडितका लागि रकम सङ्कलन गरिएको थियो । सङ्कलित रकममध्ये रु. ५३ लाख ४१ हजार ४०६ प्रधानमन्त्री दैवी प्रकोप उद्धार कोषमा दाखिला हुनेगरी प्रदान गरिएको छ ।
विद्यालयहरूले विपद्को समयमा सामाजिक उत्तरदायित्व निर्वाह गर्दै बाढीपीडितका लागि आर्थिक सहयोग जुटाएका हुन् । बाढीका कारण ठूलो जनधनको क्षति भएपछि राहत तथा पुनःस्थापनाका लागि सहयोग आवश्यक रहेकाले विद्यालयहरूले सामूहिकरूपमा रकम सङ्कलन गरेका अध्यक्ष बज्राचार्यले बताउनुभयो ।
त्यस्तै, बाँकेमा रहेका विभिन्न निजी अस्पतालले पनि भोटेकोशी बाढीपीडितका लागि रु. ६० लाख ७८ हजार ५ सय १३ सहयोग गरेका छन् । अस्पतालहरूले प्रदान गरेको रकम पनि प्रधानमन्त्री दैवी प्रकोप उद्धार कोषमा दाखिला हुनेगरी उपलब्ध गराइएको हो ।
लाइफ लाइन जनरल अस्पताल नेपालगञ्जका सञ्चालक डा. प्रतीक श्रेष्ठका अनुसार नेपालगञ्ज मेडिकल कलेज शिक्षण अस्पताल कोहलपुरले रु. २५ लाख सहयोग गरेको छ । त्यसैगरी सञ्जीवनी कलेज अफ मेडिकल साइसेन्स प्रालि नेपालगञ्जले रु. २५ लाख प्रदान गरेको छ ।
फत्तेबाल आँखा अस्पतालले रु. पाँच लाख ११ हजार, एचसीआरसी अस्पतालले रु. दुई लाख ५० हजार, न्यूरो अस्पतालले रु. एक लाख १६ हजार ५ सय १३, सागर अस्पताल नेपालगञ्जले रु. एक लाख एक हजार तथा लाइफ लाइन जनरल अस्पताल नेपालगञ्जले रु. एक लाख सहयोग गरेका छन् ।
बाँकेका निजी विद्यालय तथा अस्पतालले गरेको यो सहयोगले विपद्का बेला विभिन्न क्षेत्रबाट पीडितका लागि सहयोग जुटाउन सकिने सन्देश दिएको छ । भोटेकोशी बाढीबाट प्रभावित नागरिकको राहत, उद्धार तथा पुनःस्थापनाका लागि देशका विभिन्न क्षेत्रबाट सहयोग जुटिरहेको अवस्थामा बाँकेका शैक्षिक संस्था र स्वास्थ्य संस्थाले पनि आफ्नो तर्फबाट आर्थिक सहयोग गरेका हुन् ।
सङ्कलित रकम प्रधानमन्त्री दैवी प्रकोप उद्धार कोषमार्फत बाढीपीडितको राहत तथा उद्धारमा प्रयोग हुने जनाइएको छ । विपद्का कारण प्रभावित नागरिकलाई तत्काल राहत उपलब्ध गराउनुका साथै आगामी दिनमा पुनःस्थापना र पुनर्निर्माणका लागि समेत यस्ता सहयोग महत्वपूर्ण हुने अपेक्षा गरिएको छ ।
