काठमाडौं । संघीय संसदअन्तर्गत प्रतिनिधि सभा र राष्ट्रिय सभाको बैठक बुधबार दिउँसो बस्ने भएको छ। संसद् सचिवालयका अनुसार प्रतिनिधि सभाको बैठक दिउँसो १ बजे सिंहदरबारमा बस्नेछ।
बैठकमा कानून, न्याय तथा संसदीय मामिलामन्त्री सोविता गौतमले ‘नेपाल कानून आयोग (पहिलो संशोधन) विधेयक, २०८३’ प्रस्तुत गर्ने कार्यसूची रहेको छ।
त्यस्तै, मन्त्री गौतमले ‘मेलमिलाप सम्बन्धी (दोस्रो संशोधन) विधेयक, २०८३’ माथि विचार गरियोस् भन्ने प्रस्ताव पनि बैठकमा प्रस्तुत गर्नेछिन्। यसैगरी, ‘एशियाली विधायिकी संस्थाहरूको परिषद्को सदस्यता प्राप्त गर्ने सम्बन्धी प्रस्ताव’ समेत पेश गर्ने कार्यसूची रहेको संसद् सचिवालयले जनाएको छ।
यसैबीच, राष्ट्रिय सभाको बैठक पनि बुधबारै दिउँसो सवा १ बजे बस्ने भएको छ। बैठकको सुरुवातमा राष्ट्रिय सभाका अध्यक्ष नारायणप्रसाद दाहालले प्रधानमन्त्री तथा मन्त्रिपरिषद्को कार्यालयबाट प्राप्त मन्त्रिपरिषद् सदस्यहरूको कार्यभार तोकिएको सम्बन्धी पत्रको व्यहोरा पढेर सदनलाई जानकारी गराउने कार्यक्रम रहेको छ।
बैठकमा विधायन व्यवस्थापन समितिका सभापति कृष्णबहादुर रोकायाले ‘नेपाल विशेष सेवा ऐन, २०४२ को साविकको व्यवस्था जगाउने सम्बन्धी विधेयक, २०८३’ सम्बन्धी समितिको प्रतिवेदन पेश गर्ने कार्यसूची रहेको छ।
प्रतिनिधि सभा र राष्ट्रिय सभाका बैठकमा विभिन्न विधेयक तथा प्रस्तावमाथि छलफल र आवश्यक प्रक्रिया अघि बढाइने संसद् सचिवालयले जनाएको छ।
