काठमाडौं। रसुवाकाे भोटेकोशी बाढीका कारण रसुवा र नुवाकोटका विभिन्न जलविद्युत आयोजनाको सुरुङ क्षेत्रमा आइतबार पनि खोजी तथा उद्धार कार्य निरन्तर रुपमा जारी रहेकाे छ।
नेपाली सेनाले मुख्यगरी टनेलमा खोज तथा उद्धार जारी रहेकाे जनाएको हाे। रसुवागढी जलविद्युत्, त्रिशूली–३ ‘ए’, त्रिशूली–३ ‘बी’, चिलिमे र माथिल्लो त्रिशूली–१ जलविद्युत आयोजनामा नेपाली सेना, सशस्त्र प्रहरी र नेपाल प्रहरी तथा विज्ञसहितको टोलीले खोज तथा उद्धार गरिरहेका सैनिक जनसम्पर्क तथा सूचना निर्देशनालयले जानकारी गराएकाे छ।
शनिबार रसुवागढी जलविद्युत आयोजनामा विद्युत गृहको छैठौं तलामा पुगेर खोजी गरेको र त्यसक्रममा केही फेला नपरेको सेनाले जनाएको हाे । त्रिशूली–३ ‘ए’ आयोजनाको सुरुङभित्र फसेकाको उद्धारका लागि सेनाका ७५, सशस्त्र प्रहरीका १८ एवं नेपाल प्रहरी र विज्ञसहितको संयुक्त टोली खोज तथा उद्धार तीव्र पारेको छ ।
त्रिशूली–३ ‘बी’मा सेना ८९, गैरसैनिक तीन र आयोजनाका प्रबन्ध निर्देशकसहितको संयुक्त टोलीले तीन वटा सानो डोजर र जेनेरेटरको प्रयोग गरी खोजी जारी राखेको हाे । टोलीले अडिट–२ टनेलबाट ‘एक्साभेटर’ लैजान सक्नेगरी बाटो सफा गरेको छ । चिलिमे जलविद्युत् आयोजनामा विदेशीसहितको संयुक्त टोलीले ‘मिनि एक्साभेटर’ र पम्पको सहायताले लेदो फाली १०५ मिटर भित्रसम्म खोजी गरेको हाे । त्यहाँ भित्र जाने गरी टोलीले काम गरिरहेको छ ।
माथिल्लो त्रिशूली–१ को हाकु सुरुङको २५० मिटरभित्रबाट विदेशीसहितको संयुक्त उद्धार टोलीले हिजो चिनियाँ नागरिक लु हाइताओको जीवितै उद्धार गरेको थियो । बाढीपछि सुरुङमा फसेका ३ जना र नुवाकोटको विदुरमा एउटा घरबाट एक महिला गरी दुई दिनमा ४ जनाको जिवितै उद्धार गरिएकाे सेनाले जनाएकाे छ ।
