काठमाडौँ । रसुवाको भोटेकोशी नदीमा आएको विनाशकारी बाढीका कारण घाइते भई उद्धार गरिएका २७ जनाको महाराजगञ्जस्थित त्रिभुवन शिक्षण अस्पतालमा उपचार भइरहेको छ।
अस्पतालका प्रवक्ता डा. गोपाल सेढाईंका अनुसार बाढीबाट घाइते भएका तथा उद्धारपछि अस्पताल ल्याइएका कुल ६७ बिरामीमध्ये २७ जनाको उपचार जारी छ। उपचाररत बिरामीमध्ये केहीको अवस्था गम्भीर रहेकाले चिकित्सकको विशेष निगरानीमा उपचार भइरहेको अस्पतालले जनाएको छ।
अस्पतालका अनुसार उपचार भइरहेका घाइतेमध्ये तीन जनालाई सघन उपचार कक्ष (आईसीयू) मा राखिएको छ भने दुई जनालाई हाइकेयर अर्थात् विशेष निगरानी कक्षमा राखेर उपचार भइरहेको छ।
उपचारका क्रममा एक घाइतेको मृत्यु
भोटेकोशी बाढीमा परी घाइते भएका एक जनाको भने उपचारका क्रममा मृत्यु भएको अस्पतालले जनाएको छ।
अस्पतालका प्रवक्ता डा. सेढाईंका अनुसार उपचारका क्रममा मृत्यु हुनेमा २५ वर्षीय कुशल मगर रहेका छन्। बाढीका कारण घाइते अवस्थामा उद्धार गरी अस्पताल ल्याइएका मगरको उपचारका क्रममा मृत्यु भएको हो।
यससँगै भोटेकोशी बाढीपछि उद्धार गरी त्रिभुवन शिक्षण अस्पताल ल्याइएका घाइतेमध्ये एक जनाको ज्यान गएको अस्पतालले पुष्टि गरेको छ।
३९ जना उपचारपछि घर फर्किए
अस्पतालमा उपचारका लागि ल्याइएका बिरामीमध्ये ३९ जना उपचारपछि डिस्चार्ज भइसकेका छन्। सामान्य अवस्थामा रहेका तथा आवश्यक उपचार पूरा भएका घाइतेलाई चिकित्सकको सल्लाहअनुसार अस्पतालबाट घर पठाइएको हो।
हाल उपचाररत २७ जनामध्ये आईसीयू र हाइकेयरमा रहेका बिरामीको अवस्थालाई अस्पतालले विशेष प्राथमिकताका साथ निगरानी गरिरहेको छ।
भोटेकोशी नदीमा आएको बाढीपछि रसुवालगायत प्रभावित क्षेत्रबाट घाइते तथा प्रभावित नागरिकलाई उद्धार गरी विभिन्न अस्पतालमा पुर्याउने क्रम जारी छ। बाढीका कारण प्रभावित क्षेत्रमा उद्धार तथा खोजी कार्यसँगै घाइतेको उपचारलाई पनि प्राथमिकता दिइएको छ।
भोटेकोशी बाढीबाट प्रभावित नागरिकको उद्धारपछि अस्पतालमा ल्याइएका घाइतेको उपचारमा चिकित्सक तथा स्वास्थ्यकर्मीको टोली निरन्तर खटिरहेको छ।
