काठमाडौँ । प्रधानमन्त्री बालेन्द्र शाह र राष्ट्रिय स्वतन्त्र पार्टी (रास्वपा) का सभापति रवि लामिछानेबीच आज भेटवार्ता भएको छ ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटवार्तामा रसुवाको भोटेकोशी नदीमा आएको भीषण बाढीबाट प्रभावित क्षेत्रको पछिल्लो अवस्थाबारे छलफल भएको छ ।
प्रधानमन्त्रीका प्रेस तथा अनुसन्धान विज्ञ दीपा दाहालका अनुसार भेटमा बाढी प्रभावित क्षेत्रमा सरकारले सञ्चालन गरिरहेका खोज तथा उद्धार, राहत वितरण, नागरिक व्यवस्थापन र पुनःस्थापनाका प्रयासबारे छलफल भएको हो ।
भोटेकोशी बाढीका कारण ठूलो जनधनको क्षति भएपछि बेपत्ता व्यक्तिको खोजी, जोखिममा रहेका नागरिकको उद्धार तथा विस्थापित परिवारको व्यवस्थापन चुनौतीपूर्ण बनेको छ । प्रभावित क्षेत्रमा तत्काल राहत पुर्याउनेदेखि क्षतिग्रस्त संरचनाको पुनर्निर्माण र नागरिकको दीर्घकालीन पुनःस्थापनासम्मका विषयमा सरकारको ध्यान केन्द्रित रहेको बताइएको छ ।
भेटमा बाढी प्रभावित नागरिकलाई तत्काल आवश्यक राहत तथा सुरक्षा उपलब्ध गराउने विषयसँगै प्रभावित क्षेत्रमा सरकारी संयन्त्रलाई थप प्रभावकारी रूपमा परिचालन गर्नेबारे पनि छलफल भएको जनाइएको छ ।
त्यस्तै, विपद्का कारण विस्थापित भएका नागरिकलाई सुरक्षित स्थानमा व्यवस्थापन गर्ने, प्रभावित परिवारलाई आवश्यक सहयोग उपलब्ध गराउने तथा सामान्य जनजीवन पुनःस्थापित गर्न चालिनुपर्ने कदमका विषयमा समेत कुराकानी भएको बताइएको छ ।
भोटेकोशी बाढीबाट प्रभावित नागरिकको उद्धार र राहतलाई प्राथमिकतामा राख्दै सरकार अघि बढिरहेका बेला प्रधानमन्त्री शाह र रास्वपा सभापति लामिछानेबीच भएको भेटलाई विपद् व्यवस्थापन तथा प्रभावित नागरिकको पुनःस्थापनासँग जोडेर हेरिएको छ ।
सरकारले अहिले बेपत्ताको खोजी, उद्धार, राहत वितरण र प्रभावित नागरिकको व्यवस्थापनलाई प्राथमिकतामा राखेर काम गरिरहेको जनाएको छ । आगामी दिनमा क्षतिको विस्तृत मूल्याङ्कन गरी पुनर्निर्माण तथा पुनःस्थापनाका कार्यक्रम अघि बढाउने तयारीसमेत गरिने बताइएको छ ।
