काठमाडौं । सत्तारुढ दल राष्ट्रिय स्वतन्त्र पार्टी (रास्वपा) को केन्द्रीय समिति बैठक आज (शुक्रबार) बस्दैछ। आगामी स्थानीय तह निर्वाचनको तयारीलाई केन्द्रमा राख्दै बस्न लागेको बैठकमा उम्मेदवार छनोटको रूपरेखा, ‘राइट टु रिकल’ सम्बन्धी दस्तावेज, संगठन विस्तार तथा विभिन्न तहका पदाधिकारी मनोनयनलगायत महत्त्वपूर्ण विषयमा छलफल हुने भएको छ।
पार्टीका महामन्त्री विपिनकुमार आचार्य का अनुसार बैठक बिहान ११ बजेदेखि पार्टीको केन्द्रीय कार्यालय वनस्थली, काठमाडौं मा सुरु हुनेछ। बैठकलाई आगामी स्थानीय तह निर्वाचनका लागि पार्टीको तयारीलाई व्यवस्थित बनाउने महत्त्वपूर्ण चरणका रूपमा हेरिएको छ।
बैठकमा ‘स्थानीय तह निर्वाचनका लागि उम्मेदवार छनोट रूपरेखा–२०८३’ अनुमोदन गर्ने विषय मुख्य एजेन्डाका रूपमा रहेको छ। यस रूपरेखामार्फत उम्मेदवार छनोट प्रक्रिया थप पारदर्शी, मापदण्डमा आधारित र व्यवस्थित बनाउने तयारी पार्टीले गरेको जनाएको छ।
त्यससँगै, रास्वपाले लामो समयदेखि उठाउँदै आएको ‘राइट टु रिकल’ (निर्वाचित प्रतिनिधिलाई फिर्ता बोलाउने अधिकार) सम्बन्धी अवधारणालाई संस्थागत बनाउन आवश्यक दस्तावेज निर्माण गर्ने विषयमा पनि बैठकमा विस्तृत छलफल हुनेछ। पार्टीले यसलाई जवाफदेहिता र सुशासनसँग जोडिएको महत्त्वपूर्ण नीतिगत एजेन्डाका रूपमा अघि बढाउँदै आएको छ।
मनोनयनदेखि संगठन व्यवस्थापनसम्मका निर्णय
बैठकमा संगठन व्यवस्थापनसँग सम्बन्धित विभिन्न विषयमा पनि निर्णय हुने अपेक्षा गरिएको छ। केन्द्रीय समिति सदस्य मनोनयन, पदाधिकारी मनोनयन, सचिवालय सदस्य मनोनयन तथा विभागीय प्रमुखहरूको मनोनयनबारे छलफल गरी आवश्यक निर्णय लिइने पार्टीले जनाएको छ।
यस्तै, आगामी स्थानीय निर्वाचनलाई लक्षित गर्दै केन्द्रीय उम्मेदवार छनोट समिति का सदस्यहरूको मनोनयन गर्ने विषय पनि बैठकको कार्यसूचीमा समावेश गरिएको छ। यस समितिले देशभरका स्थानीय तहका उम्मेदवार छनोट प्रक्रियामा समन्वय र मापदण्ड कार्यान्वयनको जिम्मेवारी निर्वाह गर्ने अपेक्षा गरिएको छ।
देशव्यापी प्रशिक्षण कार्यक्रम सञ्चालन गर्ने तयारी
रास्वपाले स्थानीय तह निर्वाचनको तयारीलाई प्रभावकारी बनाउन केन्द्रीय समिति सदस्य तथा प्रतिनिधि सभा सदस्यहरूको नेतृत्वमा देशभर अभिमुखीकरण तथा प्रशिक्षण कार्यक्रम सञ्चालन गर्ने योजना पनि अघि सारेको छ।
बैठकमा यस कार्यक्रमको ढाँचा, कार्ययोजना र कार्यान्वयन विधिबारे छलफल गरी आवश्यक निर्णय गरिनेछ। पार्टीले यसमार्फत स्थानीय तहका नेता–कार्यकर्तालाई उम्मेदवार छनोट प्रक्रिया, संगठन सुदृढीकरण तथा निर्वाचन रणनीतिबारे एकरूप जानकारी दिने लक्ष्य राखेको छ।
डिजिटल मुखपत्र प्रकाशन गर्ने प्रस्ताव
बैठकमा पार्टीको आधिकारिक सञ्चार माध्यमलाई थप व्यवस्थित बनाउने उद्देश्यले ‘स्वतन्त्र मासिक’ नामक डिजिटल पत्रिकालाई पार्टीको मुखपत्रका रूपमा प्रकाशन गर्ने प्रस्तावमाथि पनि छलफल हुनेछ।
पार्टीले डिजिटल माध्यममार्फत आफ्ना नीति, गतिविधि, निर्णय तथा वैचारिक सामग्रीलाई नियमित रूपमा सार्वजनिक गर्ने योजना अघि बढाएको जनाएको छ।
आगामी स्थानीय तह निर्वाचनको तयारीलाई तीव्र बनाइरहेका बेला बस्न लागेको यस बैठकबाट संगठनात्मक पुनर्संरचना, नेतृत्व चयन, उम्मेदवार छनोट प्रक्रिया तथा नीतिगत विषयमा महत्त्वपूर्ण निर्णय आउने अपेक्षा गरिएको छ।
