काठमाडौं । सत्ता समीकरणमा परिवर्तन भएसँगै नेपाली कांग्रेस कोशी प्रदेश सरकारबाट बाहिरिएको छ। बुधबार कांग्रेसबाट प्रदेश सरकारमा सहभागी मन्त्रीहरूले सामूहिक रूपमा राजीनामा दिएका हुन्।
कांग्रेस नेता तथा कोशी प्रदेशका पर्यटन, वन तथा वातावरणमन्त्री भीम पराजुलीले कांग्रेसबाट सरकारमा सहभागी मन्त्रीहरूले राजीनामा दिएको जानकारी दिएका छन्। नयाँ राजनीतिक समीकरण बनेपछि कांग्रेसका मन्त्रीहरूलाई सरकारबाट बाहिरिन दबाब बढेको थियो।
नेकपा (एमाले) र नेपाली कम्युनिस्ट पार्टी (नेकपा) बीच नयाँ सत्ता समीकरण बनेपछि कोशी प्रदेश सरकारको राजनीतिक समीकरणसमेत परिवर्तन भएको हो। नयाँ समीकरणअनुसार सरकार पुनर्गठन गर्ने तयारी भइरहेका बेला कांग्रेसका मन्त्रीहरूले राजीनामा दिएका हुन्।
कोशी प्रदेश सरकारमा नेपाली कांग्रेसबाट भौतिक पूर्वाधार विकासमन्त्री प्रदीप सुनुवार, स्वास्थ्यमन्त्री मानबहादुर लिम्बू, उद्योग, कृषि तथा सहकारीमन्त्री इस्राइल मन्सुरी, पर्यटन, वन तथा वातावरणमन्त्री भीम पराजुली र भौतिक पूर्वाधार विकास राज्यमन्त्री शोभा चेम्जोङ सहभागी थिए।
उनीहरूको राजीनामासँगै कोशी प्रदेश सरकारमा कांग्रेसको सहभागिता समाप्त भएको छ। कांग्रेस सरकारबाट बाहिरिएपछि नयाँ सत्ता समीकरणअनुसार नेकपा सरकारमा सहभागी हुने तयारीमा रहेको जनाइएको छ।
नयाँ गठबन्धनमा सहभागी दलहरूबीच मन्त्रालय बाँडफाँट र सरकार पुनर्गठनबारे छलफल भइरहेको छ। यससँगै कोशी प्रदेश सरकारमा मन्त्रीहरूको संख्या, जिम्मेवारी तथा मन्त्रालयको संरचनामा समेत परिवर्तन हुनसक्ने देखिएको छ।
सत्ता समीकरण परिवर्तनसँगै प्रदेश सरकारमा देखिएको यो फेरबदलले कोशी प्रदेशको राजनीतिक वृत्तमा नयाँ समीकरणको सुरुवात गरेको छ। नयाँ गठबन्धनअनुसार सरकार सञ्चालन र मन्त्रालय बाँडफाँटबारे आगामी दिनमा थप निर्णय हुने अपेक्षा गरिएको छ।
