काठमाडौं । राष्ट्रिय स्वतन्त्र पार्टी (रास्वपा) का सांसद रमेश प्रसाईले आफ्नै पार्टीका वरिष्ठ नेता बालेन्द्र शाह नेतृत्वको सरकारको आलोचना गर्नुभएकाे छ।
प्रतिनिधिसभाको शुक्रबारको बैठकमा शून्य समयमा बाेल्दै सांसद प्रसाईले सरकारको कार्यशैली र जनसरोकारका मुद्दामा भइरहेको ढिलासुस्तीप्रति आफ्नै सरकारको विरोध गर्नुभएकाे हाे । निर्वाचनका बेला जनतामाझ लगिएका नारा र अहिलेको वास्तविकताबिचको खाडलले आफूलाई झस्काएको बताउनुभयाे।
उहाँले भन्नुभयाे,- ‘हामीले निर्वाचन अगाडि ‘नो लाइन, केबल अनलाइन’ भन्ने नारासहित जनताको मत मागेका थियौँ। तर आज त्यो नाराले मलाई झस्काइरहेको छ। अहिले अनलाइन होइन, बजारमा नागरिकको लामो लाइन मात्र देखिन्छ। अनलाइन सेवा भनिए पनि सर्भर बिग्रेको बिग्रियै गर्छ। नागरिकले सास्ती पाएका छन् । लामो लाइन बस्दा पनि नागरिकले सहजै ग्यास पाएका छैनन्। यो समस्याको तत्काल समाधान होस् भन्ने माग गर्दछु।’
सांसद प्रसाईले सरकारी सेवाहरूलाई प्रविधिमैत्री बनाउने भनिए पनि व्यवहारमा नागरिकले सास्ती खेप्नुपरेको उल्लेख गर्नुभयाे। अनलाइन सेवा भनिएता पनि सर्भरमा बारम्बार आउने समस्याले नागरिकले दुःख पाएको उहाँको भनाइ छ।
