काठमाडौं । नेपाल आयल निगमको कार्यकारी निर्देशकमा नागेन्द्र साह नियुक्त भएका छन्। मन्त्रिपरिषद्को बुधबार बसेको बैठकले साहलाई निगमको कार्यकारी निर्देशकमा नियुक्त गर्ने निर्णय गरेको हो।
उद्योग, वाणिज्य तथा आपूर्ति मन्त्रालयका प्रवक्ता नेत्रप्रसाद सुवेदीका अनुसार मन्त्रिपरिषद्को निर्णयसँगै साहले नेपाल आयल निगमको नेतृत्व सम्हाल्ने भएका छन्।
धनुषाको नगराइन नगरपालिका–३ निवासी साह पेशाले चार्टर्ड एकाउन्टेन्ट (सीए) हुन्। उनले यसअघि पनि नेपाल आयल निगममा निमित्त कार्यकारी निर्देशकको जिम्मेवारी सम्हालिसकेकाले निगमको प्रशासन, वित्तीय व्यवस्थापन तथा सञ्चालनबारे अनुभव हासिल गरेका छन्।
नागेन्द्र साह खुला प्रतिस्पर्धामार्फत कार्यकारी निर्देशक पदमा चयन भएका हुन्। कार्यकारी निर्देशक नियुक्तिका लागि गठित सिफारिस समितिले यही साउन १७ गते अन्तिम तीन जनाको नाम मन्त्रिपरिषद्मा सिफारिस गरेको थियो।
सिफारिस समितिले नागेन्द्र साहसँगै प्यूठानका कौशल केसी र सप्तरीका सञ्जिकुमार देवको नाम पनि कार्यकारी निर्देशक पदका लागि सिफारिस गरेको थियो। तीमध्ये मन्त्रिपरिषद्ले साहलाई नियुक्त गर्ने निर्णय गरेको हो।
नेपाल आयल निगम मुलुकमा पेट्रोलियम पदार्थको आयात, भण्डारण, वितरण तथा आपूर्ति व्यवस्थापन गर्ने प्रमुख सरकारी संस्था हो। निगमको नेतृत्व सम्हाल्ने नयाँ कार्यकारी निर्देशक साहसमक्ष पेट्रोलियम पदार्थको नियमित आपूर्ति, पूर्वाधार विस्तार, वित्तीय व्यवस्थापन, भण्डारण क्षमता वृद्धि तथा सेवा प्रवाहलाई थप प्रभावकारी बनाउने चुनौती रहनेछ।
सरकारले खुला प्रतिस्पर्धाबाट योग्य नेतृत्व चयन गर्ने नीतिअनुसार नियुक्ति गरिएको जनाएको छ। नयाँ कार्यकारी निर्देशक साहले निगमको संस्थागत सुधार, पारदर्शिता र सुशासनलाई प्राथमिकतामा राखेर काम गर्ने अपेक्षा गरिएको छ।
