काठमाडौं । नेपाली सुनचाँदी बजारमा बिहीबार सुनको मूल्यले नयाँ कीर्तिमान कायम गरेको छ। लगातार दोस्रो दिन उच्च दरले बढेको सुनको मूल्य आज एकैदिन प्रति तोला ८ हजार रुपैयाँले वृद्धि हुँदै २ लाख ९६ हजार रुपैयाँ पुगेको छ।
नेपाल सुनचाँदी व्यवसायी महासंघका अनुसार बुधबार प्रतितोला २ लाख ८८ हजार रुपैयाँमा कारोबार भएको छापावाल सुन बिहीबार बढेर २ लाख ९६ हजार रुपैयाँ पुगेको हो। यसअघि बुधबार मात्रै सुनको मूल्य ४ हजार २ सय रुपैयाँले बढेको थियो। दुई दिनमै सुनको मूल्य १२ हजार २ सय रुपैयाँले उकालो लागेको छ।
बजारमा सुनको मूल्य निरन्तर बढ्दै गएपछि सर्वसाधारण, लगानीकर्ता तथा व्यवसायीबीच चासो बढेको छ। विवाह तथा अन्य शुभकार्यका लागि सुन खरिद गर्ने उपभोक्तालाई पनि मूल्यवृद्धिले थप आर्थिक भार पर्ने देखिएको छ।
यस्तै, चाँदीको मूल्य पनि बिहीबार बढेको छ। महासंघका अनुसार बुधबार प्रतितोला ४ हजार ४ सय ७५ रुपैयाँमा कारोबार भएको चाँदीको मूल्य आज ४ हजार ५ सय ७० रुपैयाँ पुगेको छ। अर्थात् चाँदीको मूल्य एकैदिन प्रति तोला ९५ रुपैयाँले वृद्धि भएको हो।
नेपाल सुनचाँदी व्यवसायी महासंघले अन्तर्राष्ट्रिय बजारमा भइरहेको मूल्यवृद्धिको प्रत्यक्ष प्रभाव नेपाली बजारमा पनि परेको जनाएको छ। महासंघका अनुसार बिहीबार अन्तर्राष्ट्रिय बजारमा सुन प्रतिऔंस ४ हजार २ सय ५९ अमेरिकी डलरमा कारोबार भइरहेको छ।
अन्तर्राष्ट्रिय बजारमा सुनको माग बढ्नु, विश्व आर्थिक अनिश्चितता, अमेरिकी डलरको उतारचढाव तथा लगानीकर्ताको सुरक्षित लगानीप्रतिको आकर्षणका कारण सुनको मूल्य निरन्तर बढिरहेको विश्लेषण गरिएको छ।
व्यवसायीहरूले आगामी दिनमा पनि अन्तर्राष्ट्रिय बजारको अवस्थाअनुसार सुनचाँदीको मूल्यमा थप उतारचढाव हुन सक्ने बताएका छन्। उनीहरूले सुन खरिद वा लगानी गर्नुअघि दैनिक प्रकाशित मूल्यसूची हेरेर मात्र निर्णय लिन उपभोक्तालाई सुझाव दिएका छन्।
