काठमाडौं । लगातारको वर्षा, पहिरो तथा बाढीका कारण देशका विभिन्न जिल्लाका प्रमुख राजमार्ग तथा सडक खण्डमा सवारी आवागमन प्रभावित भएको छ। नेपाल प्रहरीले बिहीबार बिहान ७ः५० बजेसम्मको विवरण सार्वजनिक गर्दै केही सडक पूर्ण रूपमा अवरुद्ध भएको तथा केही सडकमा रातिको समयमा सवारी सञ्चालनमा अस्थायी प्रतिबन्ध लगाइएको जनाएको छ।
प्रहरीका अनुसार काभ्रेपलाञ्चोक र सिन्धुली जोड्ने बिपी राजमार्गअन्तर्गत खुर्कोट–नेपालथोक–कटुन्जेबेँसी सडक खण्डमा सम्भावित बाढीको जोखिमलाई मध्यनजर गर्दै बेलुका ६ः०० बजेदेखि बिहान ४ः०० बजेसम्म सबै प्रकारका सवारीसाधन सञ्चालनमा रोक लगाइएको छ।
त्यसैगरी, कान्तिलोकपथमा पनि बेलुका ५ः०० बजेदेखि बिहान ५ः०० बजेसम्म सबै प्रकारका सवारीसाधन सञ्चालनमा प्रतिबन्ध लगाइएको प्रहरीले जनाएको छ।
इलाम नगरपालिका–९ स्थित मेची राजमार्गमा लगातारको वर्षाका कारण सडक हिलाम्मे बनेपछि सवारी आवागमन पूर्ण रूपमा बन्द भएको छ।
यस्तै, सिन्धुपाल्चोकको भोटेकोशी गाउँपालिकास्थित अरनिको राजमार्गको जिरोकिलो र कोदारी क्षेत्रमा पहिरो खसेपछि सडक पूर्ण रूपमा अवरुद्ध भएको छ।
दोलखाको तामाकोशी गाउँपालिका–५ किर्नेटारस्थित लामासाँघु–रामेछाप सडक खण्डमा सामाकोशी खोलाको बहावले सडक कटान गरेपछि उक्त सडकमा पनि सवारी सञ्चालन ठप्प भएको छ।
त्यसैगरी, रसुवाको उत्तरगया गाउँपालिका–५ खाल्टेस्थित पासाङ ल्हामु राजमार्गमा त्रिशूली नदीले सडक कटान गरेपछि आवागमन पूर्ण रूपमा अवरुद्ध भएको छ।
ललितपुरको बागमती गाउँपालिका–३ अन्तर्गत कान्तिलोकपथमा सुक्खा पहिरो खसेपछि उक्त सडक पनि पूर्ण रूपमा बन्द भएको छ।
यस्तै, जाजरकोट–डोल्पा सडकअन्तर्गत मूलपानीखोलामा आएको बाढीले सडक कटान गर्दा सो मार्गमा पनि सवारी आवागमन पूर्ण रूपमा अवरुद्ध भएको नेपाल प्रहरीले जनाएको छ।
प्रहरीले वर्षायाममा बाढी, पहिरो र सडक कटानको जोखिम अझै उच्च रहेकाले अत्यावश्यक बाहेकको यात्रा गर्दा सावधानी अपनाउन आग्रह गरेको छ। यात्रा सुरु गर्नुअघि सम्बन्धित जिल्ला प्रशासन, ट्राफिक प्रहरी वा सडक विभागबाट सडकको पछिल्लो अवस्थाबारे जानकारी लिएर मात्र यात्रा गर्न पनि प्रहरीले अनुरोध गरेको छ।
वर्षाका कारण सडकको अवस्था जुनसुकै बेला परिवर्तन हुन सक्ने भएकाले चालक तथा यात्रुहरूलाई विशेष सतर्कता अपनाउन र वैकल्पिक मार्गको प्रयोग गर्न समेत प्रहरीले सुझाव दिएको छ।
