काठमाडौं । जल तथा मौसम विज्ञान विभागले आज देशका विभिन्न जिल्लाबाट बग्ने साना नदी तथा खोलामा आकस्मिक बाढी (फ्ल्यास फ्लड) को मध्यम जोखिम रहने चेतावनी जारी गर्दै नदी तटीय क्षेत्रमा बसोबास गर्ने नागरिकलाई उच्च सतर्कता अपनाउन आग्रह गरेको छ।
विभागका अनुसार निरन्तर वर्षा र मनसुनी प्रणाली सक्रिय रहेकाले झापा, उदयपुर, मकवानपुर, गोरखा, लमजुङ, जाजरकोट, दैलेख, कालिकोट, डोटी, डडेलधुरा र बैतडी लगायतका जिल्लाबाट बग्ने साना नदी तथा खोलाको बहाव उल्लेख्य रूपमा बढ्न सक्ने सम्भावना रहेको छ।
बाढीविद् विनोद पराजुलीका अनुसार लगातार भइरहेको वर्षाले साना नदी र खोलामा अचानक जलसतह बढ्ने जोखिम उच्च रहने भएकाले विशेष सावधानी आवश्यक छ। उनले नदी किनार, तल्लो तटीय क्षेत्र, डुबान हुने स्थान तथा खोला आसपास बसोबास गर्ने नागरिकलाई सतर्क रहन आग्रह गरेका छन्।
विभागले विशेषगरी नदी किनारमा अनावश्यक आवतजावत नगर्न, खोल्साखोल्सी तर्ने कार्यबाट बच्न तथा बाढी आउन सक्ने संकेत देखिए तत्काल सुरक्षित स्थानतर्फ जान सुझाव दिएको छ। त्यस्तै, ग्रामीण क्षेत्रमा रहेका पुल, कजवे तथा कमजोर सडक संरचना प्रयोग गर्दा पनि सावधानी अपनाउन आग्रह गरिएको छ।
मनसुन सक्रिय रहेकाले केही स्थानमा छोटो अवधिमै भारी वर्षा हुन सक्ने सम्भावना रहेको विभागले जनाएको छ। यसका कारण साना नदीमा अचानक पानीको बहाव बढ्नुका साथै पहाडी क्षेत्रमा पहिरो र तराईका तल्लो भूभागमा डुबानको जोखिम पनि बढ्न सक्ने चेतावनी दिइएको छ।
स्थानीय तह, सुरक्षा निकाय तथा विपद् व्यवस्थापनसँग सम्बन्धित निकायलाई पनि सम्भावित जोखिमलाई मध्यनजर गर्दै आवश्यक तयारी अवस्थामा रहन विभागले अनुरोध गरेको छ। जोखिमयुक्त क्षेत्रमा रहेका नागरिकलाई मौसमको अद्यावधिक जानकारी नियमित रूपमा पछ्याउन र सम्बन्धित निकायबाट जारी हुने सूचना पालना गर्न आग्रह गरिएको छ।
विभागले आगामी केही दिन पनि मनसुनी गतिविधि सक्रिय रहने संकेत दिएको छ। त्यसैले विशेषगरी नदी किनार, खोला आसपास, पहिरोको जोखिम भएका बस्ती तथा डुबान सम्भावित क्षेत्रमा बसोबास गर्ने नागरिकले अनावश्यक जोखिम नलिन र सतर्कता अपनाउन आग्रह गरिएको छ।
