काठमाडौँ । चालु आर्थिक वर्षको पहिलो ११ महिनामा नेपालमा २५ अर्ब ५५ करोड ९९ लाख १६ हजार रुपैयाँ बराबरका १० हजार ८४५ वटा विद्युतीय सवारीसाधन आयात भएका छन्।
भन्सार विभागका अनुसार चालु आवको साउनदेखि जेठसम्म विभिन्न क्षमताका विद्युतीय सवारीसाधन नेपाल भित्रिएका हुन्।
यस अवधिमा ५० किलोवाट क्षमताका ३ हजार ६८० वटा विद्युतीय सवारीसाधन आयात भएका छन्। ती सवारीसाधनको कुल मूल्य करिब ५ अर्ब ६५ करोड रुपैयाँ रहेको विभागले जनाएको छ।
त्यस्तै, ५१ किलोवाटदेखि १०० किलोवाट क्षमतासम्मका ६ हजार ३५७ वटा विद्युतीय सवारीसाधन आयात भएका छन्। यी सवारीसाधनको मूल्य १६ अर्ब ४९ करोड ७९ लाख ४६ हजार रुपैयाँ बराबर रहेको छ।
नेपालमा पछिल्लो समय विद्युतीय सवारीसाधनको प्रयोग बढ्दै गएको छ। वातावरणमैत्री यातायात प्रवर्द्धन र इन्धन आयात घटाउने उद्देश्यले विद्युतीय सवारीप्रति उपभोक्ताको आकर्षण बढिरहेको छ।
