काठमाडौं । विश्व मल्टिपल स्क्लेरोसिस दिवसको अवसरमा मल्टिपल स्क्लेरोसिस सोसाइटी नेपालले सचेतनामूलक पदयात्रा कार्यक्रम सम्पन्न गरेको छ।
अल्का अस्पतालको सहकार्यमा आयोजित उक्त पदयात्राको उद्देश्य मल्टिपल स्क्लेरोसिस रोगबारे जनचेतना अभिवृद्धि गर्नु, प्रभावित व्यक्तिहरूप्रति समाजको साथ र सहयोग बढाउनु तथा समयमै रोगको पहिचान र उपचारको महत्त्वबारे जानकारी गराउनु रहेको आयोजकले जनाएको छ।
पदयात्रामा स्वास्थ्यकर्मी, विभिन्न संघसंस्थाका प्रतिनिधि, रोगबाट प्रभावित व्यक्तिहरू तथा सर्वसाधारणको उत्साहजनक सहभागिता रहेको थियो। सो कार्यक्रममा सस्थाका सस्थापक सचिब आयुष चन्द्रा लगाएतका सहभागीहरूले जनचेतनामूलक सन्देशसहित पदयात्रा गर्दै रोगप्रति समाजको ध्यानाकर्षण गराएका थिए।
कार्यक्रममा बोल्दै डा.अविनास चन्द्राले मल्टिपल स्क्लेरोसिस मस्तिष्क र मेरुदण्डको स्नायु प्रणालीमा असर गर्ने दीर्घकालीन रोग भएको उल्लेख गर्दै यसको समयमै पहिचान र उपचार आवश्यक रहेको बताएका छन् । उनले रोगका लक्षण, चुनौती तथा उपचारका सम्भावनाबारे समेत जानकारी गराएका थिए।
विश्वभर हरेक वर्ष मे ३० मा मनाइने विश्व मल्टिपल स्क्लेरोसिस दिवसले रोगबारे जनचेतना फैलाउनुका साथै प्रभावित व्यक्तिहरूको अधिकार, सम्मान र उपचारमा पहुँच सुनिश्चित गर्न जोड दिने गर्दछ।
कार्यक्रममा सहभागीहरूले यस्ता अभियानले समाजमा सकारात्मक सन्देश प्रवाह गर्ने र रोगबारे फैलिएका भ्रम हटाउन सहयोग पुग्ने विश्वास व्यक्त गरेका थिए।
मल्टिपल स्क्लेरोसिस सोसाइटी नेपालले आगामी दिनमा पनि जनचेतना, परामर्श तथा रोगी सहयोगसम्बन्धी कार्यक्रमलाई निरन्तरता दिने जनाएको छ।
