काठमाडौं । काठमाडौंको गोङ्गबु क्षेत्रबाट प्रहरीले एसएलआर राइफलमा प्रयोग हुने म्याग्जिन तथा ४५ राउण्ड गोलीसहित दुई जनालाई पक्राउ गरेको छ। पक्राउ परेका दुवै व्यक्तिमाथि थप अनुसन्धान अघि बढाइएको प्रहरीले जनाएको छ।
जिल्ला प्रहरी परिसर काठमाडौंका प्रवक्ता एवं प्रहरी उपरीक्षक पवनकुमार भट्टराईका अनुसार पक्राउ पर्नेमा सप्तरीको राजविराज नगरपालिका–१३ का २७ वर्षीय खगेन्द्र शर्मा र सोही स्थानका २२ वर्षीय ओमशङ्कर गुप्ता रहेका छन्। गुप्ता हाल काठमाडौं महानगरपालिका–३२ नरेफाँट क्षेत्रमा बसोबास गर्दै आएका थिए।
प्रहरीका अनुसार विशेष सूचनाको आधारमा काठमाडौं टोखा नगरपालिका–९ गोङ्गबुस्थित शिव मन्दिर नजिक रहेको काबेली गेष्टहाउसमा खानतलासी गरिएको थियो। जाँचका क्रममा उनीहरूको साथबाट एसएलआर हतियारमा प्रयोग हुने एक थान म्याग्जिन, ४५ राउण्ड गोली तथा मेटलको नक बरामद गरिएको हो।
प्रवक्ता भट्टराईले पक्राउ परेका दुवै जनामाथि हतियार तथा खरखजाना सम्बन्धी कसुरअन्तर्गत अनुसन्धान अघि बढाइएको जानकारी दिए। बरामद सामग्री कहाँबाट ल्याइएको हो, कसलाई उपलब्ध गराउने योजना थियो र यसमा अन्य व्यक्तिको संलग्नता छ वा छैन भन्ने विषयमा प्रहरीले अनुसन्धान केन्द्रित गरेको जनाएको छ।
हाल पक्राउ परेका दुवैलाई जिल्ला प्रहरी परिसर काठमाडौंको हिरासतमा राखेर थप सोधपुछ भइरहेको छ। प्रहरीले घटनालाई गम्भीर रूपमा लिँदै सम्भावित आपराधिक गतिविधिसँग सम्बन्ध जोडेर अनुसन्धान अगाडि बढाएको बताएको छ।
