काठमाडौँ । राष्ट्रिय स्वतन्त्र पार्टी (रास्वपा)ले आउँदाे स्थानीय तहकाे चुनावका लागि उम्मेदवार छनोटको विस्तृत रूपरेखा सार्वजनिक गरेकाे छ ।
बन्द कोठाभित्रको निर्णय, नातावाद, कृपावाद र आर्थिक चलखेललाई निरुत्साहित गर्दै पूर्ण रूपमा लोकतान्त्रिक र पारदर्शी विधिबाट उम्मेदवार छान्ने भन्दै रास्वपाले नयाँ रुपरेखा सार्वजनिक गरेकाे हाे ।
सार्वजनिक गरिएकाे ‘स्थानीय निर्वाचनका लागि उम्मेदवार छनोट रूपरेखा, २०८३’ मा नेताको घरदैलो चाहार्ने र शक्तिकेन्द्रलाई रिझाउनेलाई नभई जनताको मन जित्ने र स्थानीय रूपान्तरणको स्पष्ट खाका भएका व्यक्तिलाई मात्र चुनावमा उठाउने स्पष्ट पारिएको छ ।
पार्टीका अनुसार अब उम्मेदवार नेताको निगाहबाट होइन, जनताको भरोसा, सार्वजनिक आचरण र नेतृत्व क्षमताका आधारमा तय हुनेछन् । २०६२/६३ को जनआन्दोलनदेखि लिएर पछिल्लो ‘जेन-जी’पुस्ताको विद्रोहसम्मलाई विश्लेषण गर्दै रास्वपाले दलहरूमा आम नागरिकको पहुँच टुट्दा नै असन्तुष्टि बढेको निष्कर्ष निकालेको छ ।
