काठमाडौं । नेपाली कांग्रेसले गृहमन्त्री सुधन गुरुङको राजीनामा माग गर्दै सरकारसँग तत्काल छानबिन प्रक्रिया सुरु गर्न आग्रह गरेको छ ।

सोमबार पार्टीका प्रवक्ता देवराज चालिसेले जारी गरेको प्रेस विज्ञप्तिमा गृहमन्त्री गुरुङसँग सम्बन्धित पछिल्लो प्रकरणले गम्भीर प्रश्न उठाएको उल्लेख गरिएको छ । कांग्रेसले उक्त विषयलाई सार्वजनिक चासो मात्र नभई राजनीतिक नैतिकता र पारदर्शितासँग जोडिएको मुद्दा भएको जनाएको छ ।

कांग्रेसले गृहमन्त्रीमाथि लागेको आरोपबारे ढिलासुस्ती नगरी तत्काल स्वतन्त्र, निष्पक्ष र उच्चस्तरीय छानबिन प्रक्रिया सुरु गर्न सरकारसँग माग गरेको छ । “गृहमन्त्रीसँग सम्बन्धित सम्पूर्ण आरोपहरूको स्वतन्त्र, निष्पक्ष र उच्चस्तरीय छानबिन प्रक्रिया तुरुन्त प्रारम्भ गरियोस्,” विज्ञप्तिमा उल्लेख छ, “यस विषयलाई ढिलासुस्ती, प्रभाव वा ढाकछोपतर्फ लैजाने कुनै पनि प्रयासले सुशासन, नैतिकता र जनविश्वासमाथि गम्भीर आघात पुर्‍याउनेछ ।”

त्यस्तै, निष्पक्ष अनुसन्धानका लागि उपयुक्त वातावरण बनाउन गृहमन्त्री गुरुङले पदबाट राजीनामा दिनुपर्ने कांग्रेसको धारणा छ । पदमा रहँदै अनुसन्धान प्रक्रियामा प्रत्यक्ष वा अप्रत्यक्ष प्रभाव पर्ने आशंका रहने भएकाले स्वतन्त्र र प्रभावरहित छानबिन सुनिश्चित गर्न राजीनामा आवश्यक रहेको कांग्रेसले स्पष्ट पारेको छ ।