काठमाडौं । काठमाडौंका पूर्वप्रमुख जिल्ला अधिकारी छवि रिजाल पक्राउ परेका छन् । अपराध अनुसन्धान कार्यालयको टोलीले उनलाई पक्राउ गरेको हो ।
रिजाल जेनजी आन्दोलनको समयमा काठमाडौं का प्रमुख जिल्ला अधिकारी थिए । उनीमाथि गत भदौ २३ र २४ गते भएको जेनजी आन्दोलनमा दमन गरेको आरोप लागेको छ । तत्कालीन गृहमन्त्री रमेश लेखक निकट मानिएका रिजाल दमन प्रकरणपछि एक महिना नपुग्दै सीडीओ पदबाट बाहिरिएका थिए ।
गौरीबहादुर कार्की नेतृत्वको जाँचबुझ आयोगले रिजालसहित अन्य व्यक्तिमाथि कारबाही सिफारिस गरेको थियो । सोही सिफारिसका आधारमा यसअघि पूर्वप्रधानमन्त्री तथा एमाले अध्यक्ष केपी शर्मा ओली र तत्कालीन गृहमन्त्री रमेश लेखक पनि पक्राउ परिसकेका छन् ।
रिजाल काठमाडौंका सीडीओ हुनुभन्दा अघि गृह मन्त्रालयको प्रशासन महाशाखा प्रमुख थिए । सो अवधिमा कर्मचारी सरुवामा अनियमितता गरेको आरोप समेत उनीमाथि लागेको छ ।
अख्तियारले विशेष अदालतमा पठाएको विवरण अनुसार रिजालमाथि भ्रष्टाचार सम्बन्धी अनुसन्धान जारी रहेको छ । तत्कालीन गृहमन्त्रीका निजी सचिव बद्री तिवारी, स्वकीय सचिव जनक भट्ट, गृहसचिव गोकर्णमणि दुवाडी तथा त्रिभुवन अन्तर्राष्ट्रिय विमानस्थल अध्यागमन कार्यालयका प्रमुख तिर्थराज भट्टराईसँग सम्बन्धित गतिविधिहरूमाथि पनि अनुसन्धान भइरहेको जनाइएको छ ।
