धनुषा । धनुषामा भएको सवारी दुर्घटनामा एक जना ट्राफिक प्रहरीको ज्यान गएको छ ।
जिल्ला प्रहरी कार्यालय धनुषाका अनुसार जनकपुर उपमहानगरपालिका–४, मुरलीचोकमा आज भएको दुर्घटनामा मोटरसाइकल चालक ट्राफिक प्रहरी हवल्दार चन्द्रकला महतोको मृत्यु भएको हो ।
महतो जिल्ला ट्राफिक प्रहरी कार्यालय महोत्तरी मा कार्यरत थिइन् । प्रहरीका अनुसार भ्रमरपुराचोकबाट मुरलीचोकतर्फ आउँदै गरेको प्रदेश २–०३–००१ प ०१०४ नम्बरको टिपरले विपरीत दिशाबाट आउँदै गरेको प्रदेश २–०२–००२ प ७३५२ नम्बरको पल्सर मोटरसाइकललाई ठक्कर दिएको हो ।
दुर्घटनाबारे जानकारी दिँदै जिल्ला ट्राफिक प्रहरी कार्यालय धनुषाका प्रमुख सूर्यबहादुर शाही ले घटनामा गम्भीर घाइते भएकी महतोको उपचारका क्रममा मृत्यु भएको पुष्टि गरेका छन् ।
महतोको शव परीक्षणका लागि प्रादेशिक अस्पताल जनकपुर पठाइएको छ । मोटरसाइकललाई ठक्कर दिने टिपर चालक, टिपर र मोटरसाइकललाई ट्राफिक प्रहरी कार्यालय जिरोमाइलले नियन्त्रणमा राखी आवश्यक अनुसन्धान अघि बढाइएको प्रहरीले जनाएको छ ।
घटनापछि स्थानीयवासी तथा सहकर्मी प्रहरीबीच शोकको वातावरण छ । प्रहरीले दुर्घटनाको कारणबारे थप अनुसन्धान भइरहेको जनाएको छ ।
