बागमती । बागमती प्रदेशका मुख्यमन्त्री इन्द्रबहादुर बानियाँले शिक्षा प्रणालीलाई समयसापेक्ष सुधार गर्दै प्रदेशलाई गरिखाने र आत्मनिर्भर नागरिक उत्पादन गर्ने प्रदेश बनाउने लक्ष्यका साथ सरकार अघि बढिरहेको बताएका छन्। शिक्षालाई रोजगारी, सीप र प्रविधिसँग जोडेर मात्रै देश तथा प्रदेशको दिगो विकास सम्भव हुने उनले उल्लेख गरे।

हेटौँडा उपमहानगरपालिका–५ पिप्लेस्थित बालज्योति माध्यमिक विद्यालयको स्वर्ण जयन्ती समारोहलाई सम्बोधन गर्दै मुख्यमन्त्री बानियाँले अहिलेको शिक्षा प्रणालीलाई व्यवहारिक, प्राविधिक र प्रविधिमैत्री बनाउन आवश्यक रहेको बताए। परम्परागत सैद्धान्तिक शिक्षामात्र पर्याप्त नहुने उल्लेख गर्दै उनले सीप, तालिम र रोजगारीसँग प्रत्यक्ष सम्बन्ध राख्ने शिक्षा प्रणाली विकास गर्नुपर्नेमा जोड दिए।

उनका अनुसार विश्व तीव्र रूपमा कृत्रिम बुद्धिमत्ता (एआई), सूचना प्रविधि र डिजिटल प्रविधितर्फ उन्मुख भइरहेका बेला बागमती प्रदेशले पनि त्यही दिशामा शिक्षालाई रूपान्तरण गर्ने योजना अघि सारेको छ। प्राविधिक शिक्षा विस्तार, व्यावसायिक तालिम, नवप्रवर्तन र उद्यमशीलतालाई प्राथमिकता दिएर युवा पुस्तालाई स्वदेशमै रोजगारी सिर्जना गर्ने वातावरण बनाउन सरकार प्रतिबद्ध रहेको उनले बताए।

मुख्यमन्त्री बानियाँले नयाँ पुस्ताले रोजेको आधुनिक, प्रयोगात्मक र प्रविधिमुखी शिक्षालाई तत्काल पूर्णरूपमा लागू गर्न चुनौती भए पनि चरणबद्ध रूपमा सुधार गर्दै लैजाने नीति रहेको बताए। विद्यालय तहदेखि नै सीपमूलक शिक्षा, सूचना प्रविधि, प्राविधिक तालिम तथा उद्यमशीलता विकासका कार्यक्रम लागू गर्न प्रदेश सरकारले विभिन्न योजनाहरू अघि बढाएको उनले जानकारी दिए।

कार्यक्रममा उनले शिक्षालाई केवल प्रमाणपत्र प्राप्त गर्ने माध्यम नभई जीवन उपयोगी ज्ञान, सीप र उत्पादनशील क्षमतासँग जोड्नुपर्ने धारणा व्यक्त गरे। शिक्षित युवा बेरोजगार बन्ने अवस्था अन्त्य गर्न शिक्षाको ढाँचा परिवर्तन आवश्यक रहेको उनको भनाइ थियो।

उनले प्रदेश सरकार विद्यालयको भौतिक पूर्वाधार सुधार, सूचना प्रविधिको पहुँच विस्तार, शिक्षक क्षमता अभिवृद्धि तथा गुणस्तरीय शिक्षा सुनिश्चित गर्न विभिन्न कार्यक्रम सञ्चालन गरिरहेको पनि बताए। ग्रामीण तथा दुर्गम क्षेत्रका विद्यार्थीलाई पनि प्रविधिमैत्री शिक्षा उपलब्ध गराउने लक्ष्य राखिएको उनले स्पष्ट पारे।

स्वर्ण जयन्ती समारोहको अवसरमा मुख्यमन्त्री बानियाँले बालज्योति माध्यमिक विद्यालयले शिक्षा क्षेत्रमा पुर्‍याएको योगदानको प्रशंसा गर्दै आगामी दिनमा अझ गुणस्तरीय र प्रविधिमैत्री शिक्षा प्रदान गर्न सफल हुने विश्वास व्यक्त गरे। उनले शिक्षा क्षेत्रको विकासमा समुदाय, अभिभावक, शिक्षक र सरकारी निकायबीच सहकार्य आवश्यक रहेको पनि बताए।

कार्यक्रममा स्थानीय जनप्रतिनिधि, शिक्षक, विद्यार्थी, अभिभावक तथा विभिन्न क्षेत्रका व्यक्तित्वहरूको सहभागिता रहेको थियो। सहभागीहरूले शिक्षा प्रणाली सुधार, प्राविधिक शिक्षा विस्तार तथा युवालाई स्वदेशमै अवसर सिर्जना गर्नुपर्ने विषयमा जोड दिएका थिए।