काठमाडौं । फागुन ३ गते मनाइँने महाशिवरात्रि पर्व नजिकिँदै गर्दा पशुपति क्षेत्रको तयारी अन्तिम चरणमा पुगेको छ । पशुपति क्षेत्र विकास कोषले मन्दिर परिसर, आसपासका शिवालय र घाट क्षेत्रको सरसफाइ, रङरोगन र पूर्वाधार सुधारमा विशेष ध्यान दिँदै पर्वलाई व्यवस्थित बनाउने लक्ष्य लिएको छ ।
भक्तजनको सहज र सुरक्षित दर्शनका लागि भित्तामा नयाँ रङ भर्नुका साथै धुलोमैलो हटाउन विशेष अभियान चलाइएको छ । जीर्ण भौतिक संरचनाहरूको मर्मतसम्भार पनि तीव्र गतिमा भइरहेको छ । पशुपति क्षेत्र विकास कोषका कार्यकारी निर्देशक सुभाषचन्द्र जोशीका अनुसार व्यवस्थापन, सुरक्षा, स्वास्थ्य, सरसफाइ र यातायातजस्ता महत्त्वपूर्ण पक्षहरूलाई नौवटा विषयगत उपसमितिले नियालिरहेका छन् ।
संस्कृति, पर्यटन तथा नागरिक उड्डयन मन्त्री अनिलकुमार सिन्हाको नेतृत्वमा १७१ सदस्यीय मूल समारोह समिति गठन गरिएको छ । समिति ठूलो सङ्ख्यामा आउने स्वदेशी र विदेशी भक्तजनको चापलाई मध्यनजर गर्दै सुरक्षा र व्यवस्थापनको उच्च तह सुनिश्चित गर्न जिम्मेवार रहेको छ ।
महाशिवरात्रि नजिकिँदै जाँदा पशुपति क्षेत्रमा साधु-सन्तहरूको उपस्थितिमा उल्लेखनीय वृद्धि भएको छ । नेपालका विभिन्न जिल्लाका साथै भारत र अन्य देशबाट आएका नागा, अघोरी र अन्य सम्प्रदायका साधुहरूले आफ्ना धुनी स्थापना गर्न थालेका छन् । मृगस्थली, भष्मेश्वर र आसपासका क्षेत्रहरूमा साधुहरूको ध्यान र साधनाले वातावरणलाई आध्यात्मिक बनाएको छ ।
पशुपति क्षेत्रमा भक्तजनको सहजता सुनिश्चित गर्न सुरक्षा बल र स्वयंसेवक परिचालनमा विशेष ध्यान दिइएको छ । साथै, स्वास्थ्य सेवा, शौचालय व्यवस्थापन र भीड नियन्त्रणका लागि आवश्यक पूर्वाधार तयार गरिएको छ ।
पशुपति क्षेत्र विकास कोषका अनुसार यस वर्षको महाशिवरात्रि पर्वलाई व्यवस्थित, मर्यादित र सुरक्षित बनाउने उद्देश्यका साथ सम्पूर्ण तयारी पूरा भइरहेको छ । श्रद्धालुहरूले ठूलो संख्या उपस्थित हुने अपेक्षा गरिएकोले व्यवस्थापनलाई प्रभावकारी बनाउन समन्वय र निगरानी तीव्र बनाइएको छ ।
यस वर्षको पर्वले केवल धार्मिक महत्व नभई, पर्यटक र श्रद्धालुहरूको अनुभवलाई सहज, सुरक्षित र आध्यात्मिक बनाउनेतर्फ पनि केन्द्रित भएको छ । पर्यटन, सुरक्षा, स्वच्छता र व्यवस्थापनका दृष्टिले उदाहरणीय पर्वको रुपमा यस वर्षको महाशिवरात्रि पाशुपति क्षेत्रमा मनाइने तयारी पूरा भएको छ ।
