काठमाडाैं । रामेछापको मन्थली नजिक तामाकोशी नदीमा बस दुर्घटना हुँदा मृत्यु हुनेको संख्या १२ पुगेको छ । तीमध्ये ९ जनाको सनाखत भइसकेको छ भने २ जनाको पहिचान हुन बाँकी रहेको मन्थली अस्पतालले जनाएको छ ।
मृत्यु हुनेमा रामेछापको लिखु तामाकोशी गाउँपालिका–७ का ३८ वर्षीय भीमबहादुर तामाङ, सोही वडाकी ३५ वर्षीया सानुमाया तामाङ, २६ वर्षीया रमिता तामाङ र ३१ वर्षीया तारा तामाङ रहेका छन् । यस्तै, लिखु तामाकोशी–४ की २२ वर्षीया बबी तामाङ र २६ वर्षीय दीपेन्द्र बस्नेत, लिखु तामाकोशी–६ का दीपेश बस्नेत तथा सोही वडाकी ४५ वर्षीया मानकुमारी बरुवालको पनि मृत्यु भएको छ ।
यसैगरी, सिन्धुलीको गोलन्जोर गाउँपालिका–६ का ३४ वर्षीय शिव श्रेष्ठ र दोलखाको भीमेश्वर नगरपालिका–८ का ६० वर्षीय मानबहादुर तामाङको पनि दुर्घटनामा ज्यान गएको मन्थली अस्पतालका मेडिकल सुपरिटेन्डेन्ट डा. केशवसिंह धामीले जानकारी दिनुभयो ।
रामेछापका प्रहरी नायव उपरीक्षक भोला भट्टका अनुसार दुर्घटनामा बसका चालकसहित ८ जना घाइते भएका छन् । घाइतेहरूको खुर्कोटस्थित शुभ जीवन अस्पताल, मन्थली अस्पताल र तामाकोशी अस्पतालमा उपचार भइरहेको छ ।
बस चालकलाई प्रहरीले नियन्त्रणमा लिएको छ भने बसका बाँकी यात्रुको खोजी तथा उद्धार कार्य अझै जारी रहेको प्रहरीले जनाएको छ ।
काठमाडौँबाट ओखलढुङ्गातर्फ जाँदै गरेको अरनिको यातायातको प्रदेश ०३–०१–००५ ख ९९७५ नम्बरको बस आज बिहान रामेछापको मन्थली नगरपालिका–६ मसानटारस्थित सडकबाट करिब १०० मिटर तल तामाकोशी नदीमा खसेको हो ।
