काठमाडौं । आगामी २०८२ फागुन २१ मा हुने प्रतिनिधि सभा सदस्य निर्वाचनमा ‘तारा’ चुनाव चिह्न लिएर सहभागी हुने नेपाली कम्युनिस्ट पार्टीले आफ्नो चुनावी प्रतिवद्धता पत्र सार्वजनिक गरेको छ। पार्टीको मूल नाराः ‘सुशासन र रोजगारी, समाजवादको तयारी’ रहेको छ।
प्रतिवद्धता पत्रअनुसार, पार्टीले राजनीतिक स्थिरता, आर्थिक सुधारको नयाँ चरण र सामाजिक न्यायलाई समृद्धिको मुख्य आधार मान्दै विभिन्न नीतिगत योजना प्रस्तुत गरेको छ। पार्टीले मन्त्रिपरिषद्को आकार घटाउने, निर्वाचन प्रणालीलाई सरल र कम खर्चिलो बनाउने, र उच्चस्तरीय सम्पत्ति छानबिन आयोग गठन गरी भ्रष्टाचारमा शून्य सहनशीलता अपनाउने प्रतिवद्धता जनाएको छ।
आर्थिक क्षेत्रमा पार्टीले आगामी पाँच वर्षभित्र दोहोरो अङ्कको आर्थिक वृद्धिदर हासिल गर्ने र वार्षिक ५ लाख रोजगारी सिर्जना गर्ने लक्ष्य तय गरेको छ। कृषि क्षेत्रको आधुनिकीकरणका लागि ‘कृषि लगानी दशक’ घोषणा गर्ने, भूमिहीन सुकुम्वासी समस्या समाधान गर्ने, र स्वास्थ्य तथा शिक्षामा नागरिकको सहज पहुँच सुनिश्चित गर्ने विषयलाई प्राथमिकता दिइएको छ।
महिला अधिकारमा, पैतृक सम्पत्तिमा समान अधिकार सुनिश्चित गर्ने, दलित समुदायका लागि विशेष सुविधा र वैदेशिक रोजगारीमा रहेका नेपालीहरूका लागि मताधिकारको व्यवस्था मिलाउने प्रतिवद्धता पनि पत्रमा समावेश गरिएको छ।
परराष्ट्र नीतिमा पार्टीले असंलग्न कूटनीति अपनाउँदै राष्ट्रिय हित र सार्वभौमिकताको रक्षा गर्ने योजना बनाएको छ। यसै क्रममा, निजी क्षेत्र र सार्वजनिक–निजी साझेदारी मार्फत दीर्घकालीन विकास र सामाजिक समानता सुनिश्चित गर्ने दृष्टिकोण पनि पार्टीले अघि सारेको छ।
