चितवन । भक्तपुरकी रजना त्वानाबासु चितवनमा नगदसहित सम्मानित भएकी छिन् । भरतपुर महानगरपालिका–११ स्थित युनाइटेड टेक्निकल कलेजमा आयोजित स्वागत तथा बिदाइ कार्यक्रममा विशेष अतिथि चुडामणि खनालले उनलाई १० हजार रुपैयाँ नगदसहित सम्मान गरेका हुन् ।
स्नातक कम्प्युटर इन्जिनियरिङ छैटौँ सेमेस्टरमा ४ जीपीए प्राप्त गर्दै विश्वविद्यालय टपर बनेपछि उनलाई सम्मान गरिएको कलेजले जनाएको छ । त्वानाबासु हाल स्नातक तह कम्प्युटर इन्जिनियरिङमा पूर्ण छात्रवृत्तिमा अध्ययनरत छिन् । अध्ययनका साथै उनले विभिन्न अतिरिक्त विधाहरूमा पनि उत्कृष्ट प्रदर्शन गर्दै प्रथम स्थान हासिल गर्दै आएकी छन् ।
कार्यक्रममा कलेज सञ्चालक समितिका अध्यक्ष चुडामणि खनालले कलेजमा अध्ययनरत विद्यार्थीहरूको भविष्य उज्ज्वल हुने विश्वास व्यक्त गर्दै आवश्यक सहयोगका लागि आफू सदैव तत्पर रहने बताए । उनले नयाँ विद्यार्थीहरूलाई इमानदारीपूर्वक अध्ययन गर्न सुझाव समेत दिए ।
सो अवसरमा स्नातकोत्तर तथा अन्य विभिन्न विधामा ४ जीपीए ल्याउने विद्यार्थीहरूलाई पनि सम्मान गरिएको थियो । शिक्षकतर्फ विभागीय प्रमुख इन्जिनियर निरज बोहरा तथा लाइब्रेरियन मिरा प्याकुरेलालाई पनि विशेष सम्मान प्रदान गरिएको थियो ।
कार्यक्रममा विभिन्न खेलकुद प्रतियोगितामा उत्कृष्ट प्रदर्शन गर्ने विद्यार्थीहरूलाई समेत पुरस्कार तथा सम्मान गरिएको कलेज प्रशासनले जनाएको छ । उक्त कलेज पोखरा विश्वविद्यालयबाट सम्बन्धन प्राप्त शैक्षिक संस्था हो ।
