काठमाडौं । गुल्मी जिल्लाको रिडी–रुद्रवेणी–वामीटक्सार सडकखण्ड आजदेखि केही समयका लागि आंशिक रूपमा अवरुद्ध हुने भएको छ। उक्त सडक अन्तर्गत सत्यबती गाउँपालिकाको सिस्ने भिर क्षेत्रमा सडक स्तरोन्नति तथा चौडा गर्ने कार्य सुरु हुन लागेकाले सवारी आवागमनमा निश्चित समय बन्द गरिने जानकारी सम्बन्धित निकायले दिएका छन्।
सडक डिभिजन कार्यालय पाल्पाका अनुसार राष्ट्रिय राजमार्ग अन्तर्गत पर्ने सिस्ने भिर क्षेत्र अत्यन्त साँघुरो र जोखिमयुक्त भएकाले सडक चौडा गर्न कटिङ्ग (भिर काट्ने) कार्य आवश्यक भएको हो। यही कामलाई प्रभावकारी रूपमा सञ्चालन गर्न माघ २६ गतेदेखि फागुन १५ गतेसम्म सडक आंशिक रूपमा अवरुद्ध गरिने जनाइएको छ।
सडक निर्माण कार्यलाई सहज बनाउन जिल्ला प्रशासन कार्यालय गुल्मीलाई समन्वयका लागि पत्राचार गरिएको छ। प्रशासनले पनि स्थानीय तह, सुरक्षा निकाय तथा सरोकारवाला संस्थासँग समन्वय गर्दै काम अघि बढाउन सहयोग गरिरहेको जनाएको छ।
निर्धारित तालिकाअनुसार उक्त सडकखण्डमा दैनिक बिहान ६ बजेदेखि ९ बजेसम्म, १० बजेदेखि दिउँसो २ बजेसम्म र दिउँसो ३ बजेदेखि साँझ ७ बजेसम्म सवारी आवागमन पूर्ण रूपमा बन्द गरिनेछ। यस्तै बिहान ९ देखि १० बजे, दिउँसो २ देखि ३ बजे र साँझ ७ बजेदेखि बिहान ६ बजेसम्म सवारी आवागमन खुला रहने जिल्ला प्रशासन कार्यालय गुल्मीले जनाएको छ।
सवारी चालक तथा यात्रुहरूलाई वैकल्पिक मार्ग प्रयोग गर्न पनि आग्रह गरिएको छ। बिहान र दिउँसोको समयमा सोता–तल्लोफाँट–रुपाकोट–दोकुवा–सलाघारी–चोरकाटे सडक प्रयोग गर्न सकिनेछ भने साँझदेखि बिहानसम्म मजुवा–दम्का–रुपाकोट–म्यालपोखरी–चोरकाटे मार्ग प्रयोग गर्न सकिने जानकारी दिइएको छ।
जिल्ला प्रशासन कार्यालय गुल्मीले मुसिकोट नगरपालिका र चन्द्रकोट गाउँपालिकालाई आवश्यक समन्वय, सहजीकरण तथा सहयोग गर्न अनुरोध गरेको छ। सडक स्तरोन्नति कार्य सम्पन्न भएपछि यातायात सहज, सुरक्षित र व्यवस्थित हुने अपेक्षा गरिएको छ।
प्रशासनले स्थानीय बासिन्दा, यातायात व्यवसायी तथा सर्वसाधारणलाई निर्माण अवधिभर धैर्य राखी सहयोग गर्न आग्रह गरेको छ। दीर्घकालीन रूपमा सडक सुधारले यात्रु तथा स्थानीय जनजीवनमा सकारात्मक प्रभाव पार्ने विश्वास गरिएको छ।
