काठमाडौं । माई मार्टले आफ्नो सेवा विस्तार गर्दै अब उपभोक्तासम्म सिधै अनलाइन किनमेल सेवा सुरु गरेको छ । नयाँ मोबाइल एप ‘माई मार्ट–डेलिभर्ड इन मिनेट्स’ मार्फत उपभोक्ताले दैनिक उपभोग्य सामग्रीहरू अर्डर गरेकै दिन छिटो डेलिभरीमार्फत प्राप्त गर्न सक्ने व्यवस्था गरिएको कम्पनीले जनाएको छ ।
डिजिटल प्रविधिको बढ्दो प्रयोग र उपभोक्ताको बदलिँदो किनमेल व्यवहारलाई ध्यानमा राख्दै माई मार्टले द्रुत डेलिभरीसहितको डाइरेक्ट टु कन्ज्युमर (D2C) मोडेल सञ्चालनमा ल्याएको हो । यसअघि व्यवसाय–देखि–व्यवसाय (B2B) मोडेलमार्फत सेवा दिँदै आएको कम्पनीले अब उपभोक्तामैत्री सेवा विस्तार गर्दै अनलाइन किनमेललाई अझ सहज बनाउने प्रयास गरेको जनाएको छ ।
कम्पनीका अनुसार बजारको माग, आन्तरिक तयारी तथा आपूर्ति प्रणालीको सफल परीक्षणपछि मात्रै नयाँ सेवा सुरु गरिएको हो । मोबाइल एप, अर्डर व्यवस्थापन, स्टक कन्ट्रोल र डेलिभरी सिस्टम पूर्ण रूपमा तयारी अवस्थामा पुगेपछि उपभोक्तालाई प्रत्यक्ष सेवा दिन थालिएको बताइएको छ ।
हाल यो सेवा काठमाडौं उपत्यकाका विभिन्न क्षेत्रमा उपलब्ध रहेको छ । आगामी दिनमा अन्य प्रमुख शहरहरूमा समेत सेवा विस्तार गर्ने योजना रहेको माई मार्टले जनाएको छ ।
माई मार्टले नेपाली उद्यमशीलता प्रवर्द्धन तथा स्वरोजगारी सृजनालाई प्राथमिकता दिँदै स्थानीय उत्पादनलाई डिजिटल बजारसँग जोड्ने लक्ष्य लिएको छ । स्वदेशी उत्पादकलाई उचित मूल्य र सुनिश्चित बजार उपलब्ध गराउन सहकार्य विस्तार गरिँदै कम्पनीले जनाएको छ ।
यस नयाँ मोडेलमार्फत रोजगारी सिर्जना, डिजिटलाइज्ड स्थानीय व्यवसाय प्रवर्द्धन तथा उपभोक्तालाई छिटो, सहज र भरपर्दो सेवा प्रदान गर्ने उद्देश्य रहेको कम्पनीको भनाइ छ । माई मार्टको मोबाइल एप हाल गुगल प्ले स्टोर र एप्पल एप स्टोरमा उपलब्ध रहेको छ ।
