काठमाडौं । नेकपा एमालेका अध्यक्ष केपी शर्मा ओलीले सामाजिक सञ्जालमार्फत सार्वजनिक बहस (पब्लिक डिबेट)का लागि राखेको प्रस्तावमा राष्ट्रिय स्वतन्त्र पार्टी (रास्वपा) वरिष्ठ नेता बालेन्द्र शाह (बालेन)ले निकै आक्रामक प्रतिक्रिया दिएका छन् । चुनावी एजेन्डा र देश निर्माणको मार्गचित्रका विषयमा बहस गर्न तयार रहेको ओलीको दाबीलाई बालेनले विगतका गम्भीर घटनाक्रम उधिन्दै चुनौती दिएका हुन् ।

अध्यक्ष ओलीले आइतबार फेसबुकमा एक स्टाटस लेख्दै देश बनाउने र देश जलाउने शक्तिबीचको प्रतिस्पर्धा भइरहेको उल्लेख गरेका थिए । उनले आफ्नो पार्टी एमाले देश बनाउने पक्षमा रहेको दाबी गर्दै प्रमुख दलका नेताहरूबीच पारदर्शी बहसको खाँचो रहेको बताएका थिए । ओलीले भनेका थिए, ‘चुनावी मैदानमा रहेका दलका एजेन्डा के हुन् ? देश निर्माणको रोडम्याप के छ ? यस्ता प्रश्नमा म आमने-सामने बहस गर्न तयार छु ।’

ओलीको सोही पोस्टमा टिप्पणी गर्दै बालेन शाहले निकै कठोर शब्द प्रयोग गरेका छन् । बालेनले ओलीको ‘देश जलाउने’ भन्ने शब्दावलीलाई व्यङ्ग्य गर्दै नेताहरूले विगतमा गरेका हिंसात्मक क्रियाकलापको जवाफ मागेका छन् । बालेनले लेखेका छन्, ‘आफूलाई देश जलाउनेको रूपमा स्वीकारेको ठिकै छ । २३ गते बच्चाहरू मारेको आतङ्कवाद लुकाउन २४ गते (घर) जलाएको कुरा तपाईँहरूलाई नै थाहा थियो ।’

उनले थप अगाडि बढ्दै ओलीलाई प्रश्न गरेका छन्, ‘आफूलाई आतङ्कवादी चाहिँ कहिले स्विकार्ने हो ? त्यो स्वीकारेपछि मात्र अरू कुरा गरौँला ।’