मकवानपुर । बागमती प्रदेशका मुख्यमन्त्री इन्द्रबहादुर बानियाँले आज प्रदेशसभाबाट विश्वासको मत लिँदैछन् । दिउँसो ४ बजे बस्ने प्रदेशसभा बैठकमा उनले विश्वासको मत लिने कार्यसूची रहेको छ । नेपालको संविधानको धारा १६८ को उपधारा (२) बमोजिम मुख्यमन्त्री नियुक्त भएका बानियाँले सोही धाराको उपधारा (४) अनुसार ३० दिनभित्र विश्वासको मत लिनुपर्ने संवैधानिक प्रावधान अनुसार यो प्रक्रिया अघि बढाएका हुन् ।
गत साउन २० मा नेपाली कांग्रेस र नेकपा (एमाले) का ६४ सांसदको समर्थनमा मुख्यमन्त्री नियुक्त भएका बानियाँका लागि यो विश्वासको मत संवैधानिक औपचारिकता मात्र हुनुपर्ने हो । ११० सदस्यीय प्रदेशसभामा सरकार टिकाउन ५६ मत आवश्यक पर्छ, जबकि सत्ता गठबन्धनसँग ६४ सांसद छन् । नेपाली कांग्रेसका ३७ र एमालेका २७ सांसद रहेकाले सरकार सहज बहुमतमा देखिन्छ ।
यद्यपि, मुख्यमन्त्री बानियाँलाई आफ्नै दलभित्रको आन्तरिक कलहले चुनौती थपिदिएको छ । पूर्वमुख्यमन्त्री बहादुरसिंह लामा पक्षका करिब १४ जना सांसदले विश्वासको मत नदिने चेतावनी दिएका छन्, जसले गर्दा बानियाँको मुख्यमन्त्री पद जोखिममा पर्न सक्ने देखिएको छ । लामा पक्षले मन्त्रिपरिषद् विस्तारमा आफ्नो समूहलाई बेवास्ता गरिएको र पूर्वसहमति कार्यान्वयन नभएको आरोप लगाएको छ ।
यसअघि, सत्ता साझेदार दलहरू नेपाली कांग्रेस र नेकपा (एमाले)ले आ-आफ्ना सांसदहरूलाई मुख्यमन्त्री बानियाँको पक्षमा मतदान गर्न ह्विप जारी गरिसकेका छन् । दुवै दलले साउन २४ गते नै सूचना जारी गर्दै अनिवार्य उपस्थित भएर विश्वासको मतको पक्षमा उभिन निर्देशन दिएका हुन् । दलीय व्यवस्थामा ह्विप उल्लंघन गरेमा सांसद पद नै खारेज हुन सक्ने कानुनी व्यवस्थाका कारण सांसदहरूले ह्विप मान्नेमा मुख्यमन्त्री बानियाँ विश्वस्त देखिन्छन् ।
कांग्रेसभित्रको शक्ति संघर्षकै कारण बहादुरसिंह लामाले मुख्यमन्त्री पदबाट राजीनामा दिएपछि बानियाँले सरकारको नेतृत्व सम्हाल्ने अवसर पाएका थिए । बानियाँ बागमती प्रदेशका छैटौं मुख्यमन्त्री हुन् । प्रदेशसभामा प्रमुख प्रतिपक्षी दल नेकपा (माओवादी केन्द्र)का २१, राष्ट्रिय प्रजातन्त्र पार्टी (राप्रपा)का १३ (सभामुखसहित), एकीकृत समाजवादीका ७, नेपाल मजदुर किसान पार्टीका ३ र हाम्रो नेपाली पार्टीका २ सांसद छन् ।
