काठमाडौं । देशका विभिन्न स्थानमा बाढीपहिरोका कारण प्रमुख राजमार्ग तथा सडकहरू अवरुद्ध भएका छन्। लगातारको वर्षापछि आएको बाढी र पहिरोका कारण सडक अवरुद्ध हुँदा यातायात सञ्चालनमा समस्या भएको छ।
प्रहरी प्रधान कार्यालयले बिहीबार बिहान साढे ७ बजे सार्वजनिक गरेको अद्यावधिक विवरणअनुसार खोटाङ र अर्घाखाँचीका दुई प्रमुख सडक पूर्ण रूपमा अवरुद्ध भएका छन्।
खोटाङमा मध्यपहाडी लोकमार्ग अवरुद्ध
खोटाङमा मध्यपहाडी लोकमार्ग पूर्ण रूपमा अवरुद्ध भएको छ। बिहीबार बिहान ६ः४० बजे हलेसी तुवाचुङ नगरपालिका–१, दौतेखोलामा ढुंगासहितको पहिरो खसेपछि सडक पूर्ण रूपमा बन्द भएको प्रहरीले जनाएको छ।
पहिरोले सडक ढाकिएपछि उक्त सडकखण्डमा यातायात आवागमन प्रभावित भएको छ। सडक खुलाउन सम्बन्धित निकायले आवश्यक पहल गरिरहेको प्रहरीले जनाएको छ।
अर्घाखाँचीमा सालझण्डी–ढोरपाटन सडक बन्द
यसैगरी अर्घाखाँचीमा सालझण्डी–ढोरपाटन सडक पनि पूर्ण रूपमा अवरुद्ध भएको छ।
बिहीबार बिहान ७ः०९ बजे पाणिनी गाउँपालिका–२ स्थित ढुङग्रेखोला नजिकै लेदोसहितको पहिरो खसेपछि सडक पूर्ण रूपमा अवरुद्ध भएको प्रहरीले जनाएको छ।
पहिरोका कारण सडकमा लेदो तथा माटो थुप्रिएपछि यातायात सञ्चालन हुन सकेको छैन।
देशका विभिन्न क्षेत्रमा लगातार वर्षा भइरहेकाले थप पहिरो तथा बाढीको जोखिम रहन सक्ने भन्दै प्रहरीले सडक प्रयोग गर्दा सावधानी अपनाउन आग्रह गरेको छ। यात्रुले यात्रा गर्नुअघि सम्बन्धित सडकको अवस्था बुझेर मात्र आवागमन गर्नुपर्ने देखिएको छ।
