काठमाडौं । काठमाडौंको त्रिपुरेश्वरमा बसमा आगलागी हुँदा चालक अर्जुन दोङको मृत्यु भएको घटनाको विरोधमा यातायात व्यवसायी तथा श्रमिकहरूले मंगलबार कीर्तिपुरस्थित बर्न अस्पतालबाहिर प्रदर्शन गरेका छन्।
स्वतन्त्र चालक संघ नेपालको अगुवाइमा यातायात व्यवसायी, श्रमिक तथा मृतक चालक दोङका परिवारका सदस्यहरूले अस्पतालबाहिर प्रदर्शन गरेका हुन्। प्रदर्शनकारीहरूले घटनाको निष्पक्ष छानबिन गरी दोषीमाथि कडा कानुनी कारबाही गर्नुपर्ने माग राखेका छन्।
सोमबार काठमाडौंको त्रिपुरेश्वरमा बसमा आगलागी हुँदा मकवानपुरका चालक अर्जुन दोङ गम्भीर रूपमा घाइते भएका थिए। आगलागीमा परेर गम्भीर घाइते भएका दोङको कीर्तिपुरस्थित बर्न अस्पतालमा उपचारका क्रममा सोमबार राति मृत्यु भएको थियो।
दोङको मृत्यु भएपछि परिवार तथा यातायात क्षेत्रसँग आबद्ध श्रमिक र व्यवसायीहरू आन्दोलित भएका हुन्। प्रदर्शनका क्रममा उनीहरूले चालक तथा सहचालकमाथि हुने गरेको भनिएको ज्यादती तत्काल रोक्नुपर्ने मागसमेत उठाएका छन्।
प्रदर्शनकारीहरूले घटनाको निष्पक्ष छानबिन, दोषीलाई कारबाही, मृतक चालकका परिवारलाई उचित क्षतिपूर्ति, चालक आयोग गठन तथा चालकहरूमाथि हुने ट्राफिक प्रहरीको अनावश्यक दुःख तथा ज्यादती अन्त्य गर्नुपर्ने माग अघि सारेका छन्।
उनीहरूले चालक र सहचालकको सुरक्षा तथा अधिकार सुनिश्चित गर्न राज्यले गम्भीरतापूर्वक पहल गर्नुपर्ने बताएका छन्। यातायात क्षेत्रमा काम गर्ने श्रमिकको सुरक्षाका विषयमा राज्य जिम्मेवार बन्नुपर्ने उनीहरूको भनाइ छ।
प्रदर्शनमा संयुक्त ट्रेड युनियन समन्वय केन्द्र (जेटियूसीसी) का महासचिव नवराज दाहालले राज्यले सवारी चालक तथा सहचालकमाथि अन्याय गरेको आरोप लगाउनुभयो। उहाँले घटनाको निष्पक्ष छानबिन गरी पीडित परिवारलाई उचित राहत र क्षतिपूर्ति उपलब्ध गराउनुपर्ने बताउनुभयो।
दाहालले सरकारले पीडितलाई न्याय दिलाउन र दोषीलाई कारबाही गर्न ढिलाइ गरे श्रमिकहरू आन्दोलनमा उत्रिन बाध्य हुने चेतावनीसमेत दिनुभयो।
उहाँले राज्य र प्रशासनले घटनालाई गम्भीरतापूर्वक लिएर तत्काल आवश्यक अनुसन्धान गर्नुपर्ने बताउँदै पीडित परिवारलाई उचित क्षतिपूर्तिसहित न्याय दिनुपर्नेमा जोड दिनुभयो।
प्रदर्शनकारीहरूले चालक र सहचालकमाथि हुने व्यवहार तथा उनीहरूको सुरक्षा व्यवस्थाबारे सरकारले स्पष्ट नीति बनाउनुपर्ने मागसमेत गरेका छन्। उनीहरूले यातायात श्रमिकलाई सुरक्षित वातावरणमा काम गर्ने अवस्था सिर्जना गर्न र घटनामा संलग्न व्यक्तिको पहिचान गरी कानुनी दायरामा ल्याउन माग गरेका छन्।
त्रिपुरेश्वरमा भएको बस आगलागीपछि गम्भीर घाइते भएका चालक दोङको उपचारका क्रममा मृत्यु भएपछि घटनालाई लिएर यातायात क्षेत्रका श्रमिक तथा व्यवसायीहरूमा आक्रोश बढेको छ। प्रदर्शनकारीहरूले आफ्ना माग सम्बोधन नभए आगामी दिनमा आन्दोलनलाई थप व्यापक बनाउने चेतावनी दिएका छन्।
