रामेछाप । पत्रकारिता, सामाजिक सेवा तथा राजनीतिमा सक्रिय रहँदै आएकी अनिता कुमारी थापा मगर नेपाली कांग्रेसको आगामी १५औँ महाधिवेशनमा ३५ वर्षमुनिको युवा समूहबाट महाधिवेशन प्रतिनिधिका लागि उम्मेदवारी दिने तयारीमा रहेकी छन्।
२५ वर्षीया थापा मगरले किशोरावस्थादेखि नै पत्रकारितामार्फत सामाजिक क्षेत्रमा आफ्नो सक्रियता अघि बढाएकी हुन्। उनले एसईई परीक्षा दिएलगत्तै रेडियो पत्रकारिताबाट आफ्नो व्यावसायिक यात्रा सुरु गरेकी थिइन्। करिब सात वर्ष रेडियो पत्रकारितामा काम गरेपछि उनले न्यूज २४ मा जिल्ला संवाददाताका रूपमा करिब तीन वर्ष काम गरेकी थिइन्।
पत्रकारितामा सक्रिय रहँदा उनले स्थानीय स्तरमा देखिएका सामाजिक समस्या, बेथिति तथा विकृतिका विषयमा समाचारमार्फत आवाज उठाउँदै आएकी थिइन्। समाजमा रहेका समस्या र नागरिकका सरोकारका विषयलाई सार्वजनिक बहसमा ल्याउने पत्रकारिताको अनुभवले आफूलाई सामाजिक तथा राजनीतिक क्षेत्रमा काम गर्न प्रेरित गरेको उनको भनाइ छ।
पत्रकारितासँगै थापा मगर पछिल्लो समय सामाजिक तथा राजनीतिक गतिविधिमा पनि सक्रिय हुँदै आएकी छन्। उनी लामो समयदेखि नेपाली कांग्रेसको राजनीतिमा आबद्ध रहेको बताउँछिन्। कांग्रेसको १४औँ महाधिवेशनमा क्षेत्रीय प्रतिनिधिका रूपमा सहभागी भएकी उनी आगामी १५औँ महाधिवेशनका लागि पनि क्षेत्रीय प्रतिनिधि बनेकी छन्।
अब उनले महाधिवेशनमा ३५ वर्षमुनिको युवा समूहबाट केन्द्रीय महाधिवेशन प्रतिनिधिका रूपमा उम्मेदवारी दिने तयारी गरेकी छन्। युवा पुस्ताको सहभागिता र प्रतिनिधित्वलाई प्राथमिकता दिँदै आफूले उम्मेदवारीको तयारी गरेको उनको भनाइ छ।
राजनीतिसँगै थापा मगर सामाजिक तथा सांस्कृतिक क्षेत्रमा पनि सक्रिय छिन्। उनी राष्ट्रिय लोक तथा दोहोरीगीत प्रतिष्ठान नेपाल, रामेछाप शाखाको सचिवका रूपमा कार्यरत छन्। यस भूमिकामार्फत उनले कला, संस्कृति तथा लोकसंगीतसँग सम्बन्धित गतिविधिमा समेत सहभागिता जनाउँदै आएकी छन्।
शैक्षिक रूपमा पनि थापा मगर विभिन्न विषयमा अध्ययनरत छन्। उनी त्रिभुवन विश्वविद्यालयअन्तर्गत योग विज्ञान विषयमा स्नातकोत्तर तहमा अध्ययन गरिरहेकी छन्। त्यसैगरी भृकुटीमण्डपस्थित नेपाल ल क्याम्पसमा एलएलबी दोस्रो वर्षमा अध्ययनरत रहेको बताइएको छ।
उनी जीवन विज्ञान नेपालसँग आबद्ध भएर योग प्रशिक्षकका रूपमा समेत काम गर्दै आएकी छन्। सानैदेखि धार्मिक तथा आध्यात्मिक गतिविधिमा रुचि राख्दै आएकी थापा मगर पछिल्लो समय विभिन्न आध्यात्मिक गतिविधिमा समेत सहभागी हुँदै आएकी छन्।
पत्रकारिता, सामाजिक क्षेत्र, सांस्कृतिक गतिविधि र राजनीतिमा हासिल गरेको अनुभवलाई आगामी राजनीतिक यात्रामा उपयोग गर्ने उद्देश्य रहेको उनले बताएकी छन्। युवा पुस्ताका सवाललाई राजनीतिक नेतृत्वसम्म पुर्याउने तथा आफ्नो अनुभवका आधारमा पार्टीभित्र सक्रिय भूमिका निर्वाह गर्ने उद्देश्यसहित महाधिवेशन प्रतिनिधिमा उम्मेदवारीको तयारी गरेको उनको भनाइ छ।
“आफ्नो अनुभवलाई राजनीतिक यात्रामा उपयोग गर्दै युवा पुस्ताको प्रतिनिधित्व गर्न महाधिवेशन प्रतिनिधिमा उम्मेदवारीको तयारी गरेकी हुँ,” थापा मगरले भनिन्।
कांग्रेसको प्रदेश सभा क्षेत्रीय तथा प्रतिनिधि सभा क्षेत्रीय अधिवेशन यही असोज १० गते हुने कार्यक्रम रहेको छ। त्यसपछि पार्टीको केन्द्रीय महाधिवेशन आगामी असोज १६ देखि १९ गतेसम्म काठमाडौंमा सम्पन्न हुने कार्यक्रम रहेको छ।
महाधिवेशन प्रक्रियामा युवा पुस्ताको सहभागिता र प्रतिनिधित्वलाई समेत महत्वपूर्ण रूपमा हेरिँदै आएको छ। यही क्रममा रामेछापबाट ३५ वर्षमुनिको समूहमा थापा मगरले उम्मेदवारीको तयारी गरेकी हुन्। उनको उम्मेदवारी र महाधिवेशन प्रतिनिधिका रूपमा चयन हुने वा नहुने विषय सम्बन्धित अधिवेशनको निर्वाचन प्रक्रियाबाट टुंगो लाग्नेछ।
