काठमाडौं । नेपाली कांग्रेस रामेछापका जिल्ला नेता भरत चौलागाईंलाई केन्द्रीय अनुसन्धान ब्यूरो (सीआईबी)ले पक्राउ गरेको छ। चौलागाईंलाई बिहीबार साँझ रामेछापको मन्थलीबाट नियन्त्रणमा लिइएको हो।
कांग्रेसको १५औँ महाधिवेशनको तयारीसम्बन्धी बैठकमा सहभागी हुन चौलागाईं मन्थली पुगेका थिए। उनी नेपाली कांग्रेसका महाधिवेशन प्रतिनिधिसमेत हुन्।
सीआईबीका अनुसार उच्च पदस्थ व्यक्तिहरूको नाम प्रयोग गरी रकम असुली गरेको आरोपमा चौलागाईंलाई नियन्त्रणमा लिइएको हो। सीआईबीका एआईजी उमाप्रसाद चतुर्वेदीका अनुसार रकम असुलीका लागि कुराकानी तथा डिल गरेको भनिएको अडियोसमेत अनुसन्धानका क्रममा फेला परेको छ।
प्रारम्भिक अनुसन्धानका क्रममा केही प्रमाण फेला परेपछि त्यसको सत्यापन तथा घटनाबारे थप अनुसन्धान गर्न चौलागाईंलाई नियन्त्रणमा लिइएको सीआईबीले जनाएको छ।
सीआईबीका अनुसार बरामद भएको भनिएको अडियो तथा अन्य प्रमाणको वास्तविकता परीक्षण भइरहेको छ। उक्त प्रमाणको परीक्षणपछि घटनामा चौलागाईंको भूमिका तथा आरोपसँग सम्बन्धित थप तथ्य खुल्ने प्रहरीले जनाएको छ।
पक्राउपछि चौलागाईंलाई काठमाडौं ल्याएर थप अनुसन्धान अघि बढाउने तयारी रहेको सीआईबीले जनाएको छ। हालसम्म उनीमाथि लागेको आरोप अनुसन्धानकै क्रममा रहेकाले आरोप पुष्टि भइसकेको छैन।
