काठमाडौं । हुण्डी कारोबारमार्फत रु १ अर्ब ५७ करोडभन्दा बढी रकमको कारोबार गरेको आरोपमा प्रहरीले विराटनगरबाट दुई जनालाई पक्राउ गरेको छ।
पक्राउ पर्नेमा विराटनगर महानगरपालिका–१५ रानीका ५६ वर्षीय शम्भुप्रसाद साह र विराटनगर महानगरपालिका–१७ का ३५ वर्षीय सुरजप्रसाद साह रहेका छन्। उनीहरूलाई जिल्ला प्रहरी कार्यालय सुनसरीबाट खटिएको प्रहरी टोलीले बिहीबार पक्राउ गरेको हो।
जिल्ला प्रहरी कार्यालय सुनसरीका सूचना अधिकारी चन्द्रबहादुर खड्काका अनुसार विभिन्न व्यक्तिले हुण्डी कारोबार गर्दै आएको भन्ने सूचनाका आधारमा प्रहरीले अनुसन्धान अघि बढाएको थियो।
अनुसन्धानका क्रममा शङ्कास्पद व्यक्तिहरूको बैंकिङ कारोबारको विश्लेषण गर्दा शम्भुप्रसाद साह र सुरजप्रसाद साहले अन्य व्यक्तिसँगको मिलेमतोमा व्यक्तिगत तथा विभिन्न फर्मका नाममा रहेका बैंक खाताहरू प्रयोग गरी ठूलो रकमको कारोबार गरेको देखिएको प्रहरीले जनाएको छ।
प्रहरीका अनुसार उनीहरूले बैंक खातामार्फत रु १ अर्ब ५७ करोड ६४ लाख ३९ हजार ३४० बराबरको रकम हुण्डीमार्फत कारोबार गरेको प्रारम्भिक अनुसन्धानबाट खुलेको छ।
हुण्डी कारोबारमार्फत ठूलो रकमको वित्तीय कारोबार गरेको आरोपमा पक्राउ परेका दुवै जनामाथि प्रहरीले थप अनुसन्धान अघि बढाएको छ।
सूचना अधिकारी खड्काका अनुसार उनीहरूलाई मुलुकी अपराध संहिता, २०७४ अन्तर्गत हुण्डीसम्बन्धी कारोबार गर्न नहुने कसुर, सङ्गठित अपराध निवारण ऐन, २०७० तथा सम्पत्ति शुद्धीकरण (मनी लाउण्डरिङ) निवारण ऐन, २०६४ बमोजिमको कसुरमा अनुसन्धानका लागि पक्राउ गरिएको हो।
पक्राउ परेका दुवै जनालाई जिल्ला प्रहरी कार्यालयमा राखिएको छ। प्रहरीले उनीहरूको बैंकिङ कारोबार, अन्य व्यक्तिसँगको संलग्नता तथा रकमको स्रोत र कारोबारसम्बन्धी विषयमा थप अनुसन्धान भइरहेको जनाएको छ।
प्रहरीले अनुसन्धानका क्रममा प्राप्त हुने थप तथ्य र प्रमाणका आधारमा घटनामा संलग्न अन्य व्यक्तिको भूमिकाबारे समेत अनुसन्धान अघि बढाउने जनाएको छ।
