काठमाडौं । विश्वचर्चित अस्ट्रेलियन क्रिकेटर डेभिड वार्नरले नेपाल प्रिमियर लिग (एनपीएल)को तेस्रो संस्करण खेल्ने भएका छन् । अस्ट्रेलियाका सुपरस्टार ओपनर वार्नर काठमाडौं गोर्खाजबाट एनपीएल खेल्ने भएका हुन् ।
काठमाडौं गोर्खाजले मंगलबार सामाजिक सञ्जालमार्फत भिडियो सार्वजनिक गर्दै वार्नरलाई टोलीमा अनुबन्ध गरिएको पुष्टि गरेको हो । फ्रेन्चाइजले यसअघि वार्नरलाई टोलीमा भित्र्याउने संकेत गरे पनि आधिकारिक घोषणा भने मंगलबार गरेको हो ।
वार्नर एनपीएलमा जोडिने अहिलेसम्मकै ठूलो अन्तर्राष्ट्रिय क्रिकेट नाम हुन् । यसअघि पहिलो संस्करणमा भारतका शिखर धवन कर्णाली याक्स तथा दोस्रो संस्करणमा दक्षिण अफ्रिकाका फाफ डु प्लेसिस विराटनगर किङ्सबाट एनपीएलमा सहभागी भएका थिए ।
टी–२० क्रिकेटमा भने वार्नरलाई धवन र डु प्लेसिसभन्दा पनि प्रभावशाली खेलाडीका रूपमा हेरिन्छ । उनले विश्वका विभिन्न चर्चित टी–२० लिगमा खेल्दै उत्कृष्ट प्रदर्शन गरेका छन् ।
काठमाडौं गोर्खाजले सार्वजनिक गरेको भिडियोमा वार्नरले नेपाल आउन आफू निकै उत्साहित रहेको बताएका छन् ।
उनले भनेका छन्, ‘एनपीएल र यसका समर्थकहरूको जोश र उत्साहबारे मैले धेरै सुनेको छु । अब आफैंले त्यो अनुभव गर्न म निकै उत्साहित छु । तपाईंहरू सबैलाई भेट्न म आतुर छु ।’
वार्नरले कठिन परिस्थितिमा एनपीएलले मानिसहरूमा खुसी ल्याउने र एकताबद्ध गर्ने माध्यम बन्न सक्ने विश्वाससमेत व्यक्त गरेका छन् ।
‘यो समय धेरै मानिसका लागि निकै कठिन रहँदै आएको छ । यस्तो अवस्थामा एनपीएलले केही खुसी ल्याउन र मानिसहरूलाई एकजुट भएर साथ दिन एउटा माध्यम बन्न सकोस् भन्ने मेरो आशा छ,’ उनले भनेका छन् ।
एनपीएलको तेस्रो संस्करणमा वार्नरको आगमनसँगै प्रतियोगिताको अन्तर्राष्ट्रिय आकर्षण थप बढ्ने अपेक्षा गरिएको छ । अस्ट्रेलियाका सफल क्रिकेटरमध्ये एक वार्नर टी–२० क्रिकेटमा विश्वकै चर्चित ब्याटरका रूपमा परिचित छन् ।
