काठमाडौँ । लमजुङ र मनाङ जोड्ने बेँसीसहर–चामे सडकअन्तर्गत मनाङको नासो गाउँपालिका–३ धारापानीमा आज सडक ढलान गरिने भएकाले सडक पूर्ण रूपमा बन्द हुने भएको छ ।
धारापानी क्षेत्रमा सडक ढलानको काम गर्नुपर्ने भएकाले आज बिहान ९ः०० बजेदेखि साँझ ५ः०० बजेसम्म सडकमा कुनै पनि प्रकारका सवारीसाधन सञ्चालन गर्न नदिइने भएको हो ।
मनाङका प्रमुख जिल्ला अधिकारी मुक्तिप्रसाद खनालका अनुसार धारापानी क्षेत्रमा १३५ मेगावाट क्षमताको मनाङ मर्स्याङ्दी जलविद्युत् आयोजनाले करिब ५० मिटर सडक ढलान गर्ने भएको छ ।
सडक साँघुरो हुनुका साथै सडकको दुवैतर्फ घरहरू रहेकाले ढलानको काम भइरहेका बेला सवारीसाधन सञ्चालनका लागि वैकल्पिक मार्गको व्यवस्था गर्न सम्भव नभएको प्रमुख जिल्ला अधिकारी खनालले बताउनुभयो । त्यसैले ढलानको काम सम्पन्न गर्न सडक पूर्ण रूपमा बन्द गर्नुपर्ने अवस्था आएको हो ।
सडक बन्द हुने अवधिमा अत्यावश्यक कामबाहेक यात्रु तथा मालवाहक सवारीसाधनलाई आवतजावत नगर्न आग्रह गरिएको छ । सडक ढलानको काममा कुनै अवरोध नहोस् र निर्माण कार्य सुरक्षित तथा सहज रूपमा सम्पन्न होस् भन्ने उद्देश्यले सडक बन्द गर्न लागिएको जनाइएको छ ।
आज बिहान ९ः०० बजेदेखि साँझ ५ः०० बजेसम्म सडक पूर्ण रूपमा बन्द रहनेछ । उक्त अवधिमा मोटरसाइकलदेखि ठूला मालवाहक सवारीसाधनसम्म कुनै पनि प्रकारका सवारीसाधन सञ्चालन गर्न पाइने छैन ।
यस्तै, साँझ ५ः०० बजेपछि सडकमा सवारीसाधन सञ्चालन गर्न दिइने भए पनि भोलि बिहान १०ः०० बजेसम्म भारी सवारीसाधन सञ्चालनमा रोक लगाइने भएको छ । ढलान गरिएको सडकलाई क्षति हुन नदिन भारी सवारीसाधनमा रोक लगाइएको हो ।
बेँसीसहर–चामे सडक मनाङ आवतजावतका लागि महत्वपूर्ण सडक हो । यस सडक हुँदै स्थानीय बासिन्दाका साथै पर्यटक तथा विभिन्न प्रयोजनका लागि यात्रा गर्नेहरू आवतजावत गर्ने गर्छन् । सडक बन्द हुने भएकाले यात्रु तथा सवारीसाधन चालकलाई समयमै जानकारी लिएर यात्रा व्यवस्थापन गर्न आग्रह गरिएको छ ।
सम्बन्धित निकायले सडक ढलानको काम तोकिएको समयभित्र सम्पन्न गरी यातायात सञ्चालन सहज बनाउने जनाएको छ । निर्माण कार्यका कारण यात्रु तथा सवारीसाधन प्रयोगकर्तालाई पर्न जाने असुविधाप्रति सम्बन्धित पक्षले सहजीकरणका लागि आवश्यक समन्वय गर्ने बताइएको छ ।
