काठमाडौं । बाल यौन दुरुपयोग मुद्दामा पक्राउ परी इलाका प्रहरी कार्यालय इटहरीको हिरासतमा रहेका एक थुनुवाको मंगलबार बिहान उपचारका क्रममा मृत्यु भएको छ ।
मृत्यु हुनेमा इटहरी उपमहानगरपालिका–४ का ६८ वर्षीय गोपाल भन्ने कुलबहादुर कार्की रहेका छन् । उनी भदौ ५ गतेदेखि इलाका प्रहरी कार्यालय इटहरीको हिरासतमा रहेका थिए ।
जिल्ला प्रहरी कार्यालय सुनसरीका प्रवक्ता प्रहरी नायब उपरीक्षक (डिएसपी) चन्द्र खड्काका अनुसार कार्की मंगलबार बिहान अचानक बेहोस भएका थिए । बिहान करिब ४ः४५ बजे एक्कासि दाँत किटेर बेहोस भएपछि उनलाई तत्काल उपचारका लागि इटहरीस्थित वेदान्त अस्पताल लगिएको थियो ।
वेदान्त अस्पतालमा प्रारम्भिक उपचारपछि थप उपचार आवश्यक देखिएपछि उनलाई तत्काल बिपी कोइराला स्वास्थ्य विज्ञान प्रतिष्ठान, धरानमा रिफर गरिएको प्रहरीले जनाएको छ । प्रतिष्ठानमा उपचार भइरहेकै क्रममा उनको मृत्यु भएको डिएसपी खड्काले जानकारी दिनुभयो ।
प्रहरीका अनुसार कार्कीलाई हिरासतमा राखिएको अवस्थादेखि नै कानुनी प्रक्रियाअनुसार मुद्दाको अनुसन्धान अघि बढिरहेको थियो । अचानक स्वास्थ्यमा समस्या देखिएपछि तत्काल अस्पताल पुर्याइएको र थप उपचारका लागि प्रतिष्ठान लगिएको प्रहरीले जनाएको छ ।
हिरासतमा रहेका व्यक्तिको उपचारका क्रममा मृत्यु भएपछि घटनाबारे आवश्यक प्रक्रिया अघि बढाइने प्रहरीले जनाएको छ । मृत्युको वास्तविक कारण भने चिकित्सकीय परीक्षण तथा आवश्यक अनुसन्धानपछि थप स्पष्ट हुने बताइएको छ ।
कार्कीको शवलाई आवश्यक कानुनी प्रक्रिया पूरा गरी परीक्षण तथा आफन्तलाई बुझाउने प्रक्रिया अघि बढाइने प्रहरीले जनाएको छ । घटनाको सम्बन्धमा सम्बन्धित निकायबाट थप विवरण आउन बाँकी रहेको छ ।
