काठमाडौं । कान्ति राजमार्गअन्तर्गत टाकुर्चे खण्डमा पहिरोका कारण सडक क्षतिग्रस्त भएपछि मर्मत तथा पहिरो पन्छाउने कार्यलाई तीव्रता दिइएको छ । सडकको ट्रयाक खसेपछि सवारी आवागमन सहज बनाउन निर्माण गरिएको अस्थायी संरचना (¥याम्प) मा समेत पुनः पहिरो सरेपछि उक्त खण्डमा सडक निकै साँघुरो बनेको हो ।

पहिरोका कारण सडकको संरचना कमजोर बन्दै गएपछि थप भासिने तथा सडक खस्ने जोखिम बढेको छ । जोखिमलाई मध्यनजर गर्दै सडकमा थुप्रिएको पहिरो तथा ढुंगामाटो हटाउने र क्षतिग्रस्त भागको पुनर्निर्माण गर्ने काम एकसाथ अघि बढाइएको सम्बन्धित निकायले जनाएको छ ।

यसअघि सडकको ट्रयाक खसेपछि तत्काल सवारी आवागमन सञ्चालन गर्न अस्थायी रूपमा ¥याम्प निर्माण गरिएको थियो । तर, सोही संरचनामाथि पुनः पहिरो खसेपछि सडकको चौडाइ घट्नुका साथै सवारी साधन आवतजावतमा थप कठिनाइ भएको छ । साँघुरो सडक र कमजोर भू–भागका कारण दुर्घटनाको जोखिमसमेत बढेको छ ।

हाल अवरुद्ध तथा असहज बनेको टाकुर्चे खण्डमा सडक विस्तार तथा पुनर्निर्माणका लागि प्राविधिक जनशक्ति परिचालन गरिएको छ । आवश्यक मेसिनरी तथा उपकरण प्रयोग गरी पहिरो हटाउने, सडक फराकिलो बनाउने र क्षतिग्रस्त संरचनालाई पुनःनिर्माण गर्ने काम भइरहेको छ ।

सडक मर्मतका क्रममा भू–भागको अवस्था, पहिरोको जोखिम र सडकको स्थायित्वलाई विशेष ध्यान दिइएको छ । तत्कालका लागि सवारी सञ्चालन सहज बनाउनेसँगै दीर्घकालीन रूपमा सडकलाई सुरक्षित र दिगो बनाउने गरी काम अघि बढाइएको बताइएको छ ।

कान्ति राजमार्ग राजधानी काठमाडौंलाई तराई तथा दक्षिणी क्षेत्रसँग जोड्ने महत्वपूर्ण सडकमार्ग भएकाले यसको कुनै पनि खण्डमा हुने अवरोधले यात्रु तथा मालवाहक सवारीको आवागमनमा प्रत्यक्ष असर पार्ने गरेको छ । टाकुर्चे खण्डमा सडक साँघुरो भएपछि उक्त मार्ग हुँदै यात्रा गर्ने सवारी चालक तथा यात्रुले थप जोखिम र असहजता सामना गर्नुपरेको छ ।

सम्बन्धित निकायले सडकको अवस्था सामान्य बनाउन आवश्यक जनशक्ति र उपकरण परिचालन गरी कामलाई प्राथमिकताका साथ अघि बढाएको जनाएको छ । सडक विस्तार तथा पुनर्निर्माणको काम सम्पन्न भएपछि सवारी साधनलाई सहज र सुरक्षित रूपमा सञ्चालन गर्न सकिने अपेक्षा गरिएको छ ।

पहिरोको जोखिम कायमै रहेकाले निर्माण तथा मर्मत कार्य भइरहेका बेला सवारी चालकलाई विशेष सावधानी अपनाउन आग्रह गरिएको छ । सडकको कमजोर भू–भागमा जथाभावी सवारी रोक्ने, ओभरटेक गर्ने वा जोखिम मोलेर आवागमन गर्ने कार्य नगर्न सम्बन्धित निकायले अनुरोध गरेको छ ।

सडकलाई सुरक्षित र पर्याप्त रूपमा फराकिलो बनाएर जतिसक्दो चाँडो नियमित यातायात सेवा सञ्चालनमा ल्याउने लक्ष्यसहित मर्मत कार्यलाई तीव्रता दिइएको छ । प्राविधिक टोलीले सडकको अवस्थाको निरन्तर मूल्याङ्कन गर्दै आवश्यकताअनुसार थप मेसिनरी र जनशक्ति परिचालन गर्ने तयारीसमेत गरेको छ ।