हेटौँडा । मकवानपुरको मनहरी गाउँपालिका–९ खरङ्गामा १६२ किलो ७९४ ग्राम अवैध लागुऔषध गाँजासहित दुई जना पक्राउ परेका छन्। राक्सिराङको भावर हुँदै खरङ्गातर्फ आउँदै गरेका दुई वटा सवारीसाधनलाई प्रहरीले नियन्त्रणमा लिँदा ठूलो परिमाणमा गाँजा बरामद भएको हो।
इलाका प्रहरी कार्यालय मनहरीको टोलीले विशेष सूचनाका आधारमा बा प्र ०१–०२५ च ०८७७ नम्बरको कारलाई निगरानीमा राखेको थियो। उक्त कारलाई ग२च ६१५ नम्बरको पिकअप गाडीले ‘स्कटिङ’ गर्दै ल्याइरहेको अवस्थामा प्रहरीले दुवै सवारीसाधनलाई नियन्त्रणमा लिएको हो।
प्रहरीका अनुसार कारको सिटमुनि लुकाएर राखिएको अवस्थामा १३ पोका गाँजा फेला परेको थियो। बरामद गरिएको गाँजाको तौल १६२ किलो ७९४ ग्राम रहेको जिल्ला प्रहरी कार्यालय मकवानपुरका प्रहरी नायब उपरीक्षक माधवप्रसाद काफ्लेले जानकारी दिनुभयो।
प्रहरी टोलीले कारलाई नियन्त्रणमा लिएपछि पिकअप चालकले सवारीसाधन लिएर भाग्ने प्रयास गरेका थिए। प्रहरीले पिकअपलाई समेत नियन्त्रणमा लिएर दुवै सवारीसाधनका चालकलाई पक्राउ गरेको हो।
पक्राउ पर्नेमा चितवनको माडी नगरपालिका–५ धोबाहा बस्ने ५६ वर्षीय देवनारायण महतो र चितवनको भरतपुर महानगरपालिका–२४ बस्ने ४८ वर्षीय टेकबहादुर दोङ रहेका छन्। महतो कार चालक हुन् भने दोङ पिकअप चालक रहेको प्रहरीले जनाएको छ।
प्रहरी नायब उपरीक्षक काफ्लेका अनुसार विशेष सूचनाका आधारमा खटिएको प्रहरी टोलीले ठूलो परिमाणमा गाँजासहित दुई वटा सवारीसाधन र चालकलाई नियन्त्रणमा लिन सफल भएको हो।
प्रहरीले बरामद भएको गाँजा, दुवै सवारीसाधन तथा पक्राउ परेका व्यक्तिलाई नियन्त्रणमा लिएर घटनाबारे थप अनुसन्धान अघि बढाएको छ। गाँजा कहाँबाट ल्याइएको थियो, कहाँ लैजाने तयारी गरिएको थियो र घटनामा अन्य व्यक्तिको समेत संलग्नता थियो वा थिएन भन्ने विषयमा प्रहरीले अनुसन्धान गरिरहेको जनाएको छ।
पछिल्लो समय मकवानपुरका विभिन्न क्षेत्रमा अवैध लागुऔषध ओसारपसार नियन्त्रणका लागि प्रहरीले निगरानी तथा चेकजाँचलाई तीव्र बनाउँदै आएको छ। विशेष सूचनाका आधारमा गरिएको यस कारबाहीबाट ठूलो परिमाणमा गाँजा बरामद भएको प्रहरीले जनाएको छ।
पक्राउ परेका दुवै जनामाथि प्रचलित कानुनअनुसार अनुसन्धान तथा आवश्यक कारबाही प्रक्रिया अघि बढाइने जिल्ला प्रहरी कार्यालय मकवानपुरले जनाएको छ।
