काठमाडौं । रसुवा र नुवाकोटसहित देशका ३९ जिल्लामा सोमबार आकस्मिक बाढीको जोखिम रहेको पूर्वानुमान गरिएको छ। बाढी पूर्वानुमान महाशाखाले विभिन्न क्षेत्रमा भारी वर्षा हुनसक्ने भएकाले नदी तथा खोलामा पानीको बहाव बढ्ने सम्भावना रहेको जनाएको छ।
महाशाखाका अनुसार सोमबार ताप्लेजुङ, संखुवासभा, तेह्रथुम, पाँचथर, इलाम, धनकुटा, झापा, मोरङ, खोटाङ, उदयपुर, ओखलढुंगा, भोजपुर, दोलखा, काभ्रेपलाञ्चोक, ललितपुर, भक्तपुर, काठमाडौं, सिन्धुपाल्चोक, रसुवा, नुवाकोट, धादिङ, गोरखा, तनहुँ, लमजुङ, कास्की, सुर्खेत, दैलेख, अछाम, कालीकोट, बाजुरा, बझाङ, बाँके, बर्दिया, दार्चुला, बैतडी, डोटी, डडेलधुरा, कैलाली र कञ्चनपुर तथा आसपासका जिल्लामा बहने स–साना नदी तथा खोलामा पानीको बहाव उल्लेख्य बढ्न सक्नेछ।
यी जिल्लामा आकस्मिक बाढीको मध्यम जोखिम रहेको महाशाखाले जनाएको छ। विशेषगरी लगातार वर्षा भइरहेका स्थानमा साना नदी, खोला तथा खोल्सामा एक्कासि पानीको सतह बढ्न सक्ने भएकाले नदी आसपास र तटीय क्षेत्रमा बसोबास गर्ने नागरिकलाई सावधानी अपनाउन आग्रह गरिएको छ।
यसैबीच सप्तकोशी, तमोर, अरुण, दूधकोशी, भेरी, पश्चिम सेती र महाकालीलगायत केही ठूला नदीमा पनि पानीको बहाव बढ्ने पूर्वानुमान गरिएको छ। ठूला नदीमा तत्काल ठूलो जोखिम नरहे पनि वर्षाको अवस्था हेरेर पानीको सतह बढ्न सक्ने भएकाले सतर्कता आवश्यक रहेको महाशाखाले जनाएको छ।
बाढीको जोखिम भएका क्षेत्रमा विशेषगरी नदी तथा खोला किनारमा रहेका बस्ती, सडक, पुल तथा तल्लो भूभागमा बसोबास गर्ने नागरिकले मौसमको अवस्था र बाढीसम्बन्धी सूचना नियमित रूपमा हेर्नुपर्ने महाशाखाको सुझाव छ।
वर्षाका कारण नदी तथा खोलामा पानीको बहाव अचानक बढ्न सक्ने भएकाले जोखिमयुक्त क्षेत्रमा अनावश्यक रूपमा नजान, बालबालिका तथा ज्येष्ठ नागरिकलाई सुरक्षित स्थानमा राख्न र स्थानीय प्रशासनले जारी गर्ने सूचनाको पालना गर्न आग्रह गरिएको छ।
महाशाखाले आगामी वर्षाको अवस्था र नदीमा पानीको बहावअनुसार बाढीको जोखिमसम्बन्धी थप सूचना सार्वजनिक गर्दै जाने जनाएको छ। त्यसैले सम्भावित जोखिमलाई ध्यानमा राख्दै सम्बन्धित जिल्लाका नागरिकलाई उच्च सतर्कता अपनाउन आग्रह गरिएको छ।
