काठमाडौं । सिन्धुपाल्चोक र धादिङसहित देशका ३६ जिल्लामा आइतबार आकस्मिक बाढीको जोखिम रहेकाे पूर्वानुमान गरिएकाे छ ।
बाढी पूर्वानुमान महाशाखाले अविरल वर्षासँगै कतिपय साना-ठूला नदीमा पानीको बहाव उल्लेख्य रुपमा बढ्ने सम्भावना रहेको जनाएको हाे। रसुवा र नुवाकोट भई बहने भोटेकोशी, त्रिशूली तथा स–साना नदीमा बहाव उल्लेख्य बढ्ने पूर्वानुमान गरिएकाे छ। यी दुई जिल्लामा आकस्मिक बाढीको उच्च सम्भावना रहेको महाशाखाले जनाएको हाे। रसुवामा आएको बाढीपश्चात् हाल भोटेकोशी र त्रिशूली नदीको बहाव शतर्कता तहभन्दा तल रहेता पनि उच्च शतर्कता अपनाउनुपर्ने देखिएकाे महाशाखाले जानकारी गराएकाे छ।
आइतबार दोलखा, सिन्धुली, काभ्रेपलाञ्चोक, ललितपुर, भक्तपुर, काठमाडौं, सिन्धुपाल्चोक, धादिङ, मकवानपुर, चितवन, नवलपरासी (बर्दघाट सुस्ता पूर्व), नवलपरासी (बर्दघाट सुस्ता पश्चिम), गोरखा, तनहुँ, लमजुङ, कास्की, स्याङ्जा, पर्वत, म्याग्दी, बागलुङ, रुकुम पश्चिम, जाजरकोट, सुर्खेत, दैलेख, अछाम, कालीकोट, बाजुरा, बझाङ, बाँके, बर्दिया, दार्चुला, बैतडी, डोटी, डडेलधुरा, कैलाली, कञ्चनपुर र आसपासका जिल्ला भई बहने स–साना नदीमा पनि बहाव उल्लेख्य बढ्ने पूर्वानुमान गरिएकाे हाे। साेही जिल्लामा आकस्मिक बाढीको मध्यम जोखिमको सम्भावना रहेको महाशाखाले जनाएको छ।
महाशाखाले तमोर, अरूण, भेरी, पश्चिम सेती र महाकाली लगायत केही ठूला नदीमा पनि बहाव उल्लेख्य रुपमा बढ्ने जानकारी गराएकाे हाे।
