काठमाडौँ । एसीसी प्रिमियर कप क्रिकेट प्रतियोगितामा नेपालले बहराइनलाई ७ विकेटले पराजित गर्दै सुखद सुरुआत गरेको छ । मलेसियाको बाङ्गीस्थित वाईएसडी–यूकेएम ओभलमा सोमबार भएको खेलमा नेपालले बहराइनले दिएको ८८ रनको सामान्य लक्ष्य २१ ओभरमा तीन विकेट गुमाएर पूरा गरेको हो ।
नेपालको जितमा अर्जुन कुमाल र रोहितकुमार पौडेलले महत्त्वपूर्ण योगदान दिए । अर्जुनले ५८ बलमा पाँच चौकासहित अविजित ३६ रन बनाए । त्यस्तै रोहितकुमार पौडेल १९ रनमा अविजित रहे । आसिफ शेखले १८ तथा देव खनालले १० रनको योगदान दिए । बहराइनका इमरान जाभेद अनवारले तीन विकेट लिए ।
यसअघि टस हारेर पहिले ब्याटिङ गरेको बहराइन नेपाली बलरसामु सुरुदेखि नै दबाबमा परेको थियो । बहराइन ३६.२ ओभरमा सबै विकेट गुमाउँदै ८७ रनमा समेटियो । बहराइनका लागि फियाज अहमदले सर्वाधिक १५ रन तथा मुहम्मद वासिमले १३ रन बनाए । अन्य कुनै पनि ब्याटरले दोहोरो अङ्कको रन बनाउन सकेनन् ।
बहराइनको इनिङ ध्वस्त पार्ने क्रममा कप्तान सन्दीप लामिछानेले उत्कृष्ट बलिङ गर्दै पाँच विकेट लिए । उनले १० ओभरमा चार मेडन राख्दै केवल १४ रन खर्चिए । ललितनारायण राजवंशीले तीन तथा करण केसीले दुई विकेट लिए ।
कप्तानका रूपमा पुनरागमन गरेका सन्दीपले पहिलो खेलमै प्रभावशाली प्रदर्शन गर्दै पाँच विकेट लिएपछि नेपालको जित सहज बनेको हो । बहराइनलाई सस्तैमा समेटेपछि नेपालले ८८ रनको लक्ष्य पछ्याउँदै संयमित ब्याटिङ गरेको थियो ।
यो जितसँगै नेपालले प्रतियोगितामा विजयी सुरुआत गरेको छ । समूह चरणमा नेपालले अब मलेसिया, साउदी अरेबिया र हङकङसँग पनि प्रतिस्पर्धा गर्नेछ ।
नेपालले प्रतियोगिताको आफ्नो दोस्रो खेल भदौ १८ गते आयोजक मलेसियासँग खेल्नेछ । समूह ‘ए’ मा नेपालसँगै बहराइन, हङकङ, मलेसिया र साउदी अरेबिया रहेका छन् । समूहका शीर्ष दुई टोली सेमिफाइनलमा पुग्नेछन् ।
