काठमाडौं। अख्तियार दुरुपयोग अनुसन्धान आयोगको महेन्द्रनगरस्थित टोलीले कैलालीको गौरीगङ्गा नगरपालिका–४ मा रहेको कालिका माध्यमिक विद्यालयका विद्यालय व्यवस्थापन समितिका एक सदस्यलाई रु दुई लाख घुससहित पक्राउ गरेको छ।
पक्राउ पर्नेमा विद्यालय व्यवस्थापन समितिका सदस्य देवबहादुर बम रहेका छन्। अख्तियारका अनुसार विद्यालयमा कार्यरत एक कर्मचारीको सेवासुविधा वृद्धि गरिदिएबापत उनले घुस रकम मागेको उजुरीका आधारमा विशेष निगरानीपछि उनलाई नियन्त्रणमा लिइएको हो।
अख्तियारले ‘स्ट्रिङ अपरेसन’ सञ्चालन गर्दै रकम लेनदेन भइरहेको अवस्थामा बमलाई नगद रु दुई लाखसहित नियन्त्रणमा लिएको जनाएको छ।
अख्तियार दुरुपयोग अनुसन्धान आयोग कञ्चनपुर कार्यालयका प्रवक्ता चेतराज भट्टले घटनास्थलमा कानुनी प्रक्रिया पूरा भइरहेको जानकारी दिँदै त्यसपछि विस्तृत अनुसन्धान अघि बढाइने बताए।
“अहिले घटनास्थलको सबै प्रक्रिया पूरा भइरहेको छ। विस्तृत अनुसन्धान अब सुरु हुन्छ,” प्रवक्ता भट्टले भने।
सेवासुविधा वृद्धि गरिदिने भन्दै रकम मागेको आरोप
प्रारम्भिक अनुसन्धानअनुसार विद्यालयमा कार्यरत कर्मचारीको सेवासुविधा वृद्धि गराइदिने नाममा देवबहादुर बमले सेवाग्राहीसँग रकम मागेको आरोप छ। त्यसपछि सेवाग्राहीले अख्तियारमा उजुरी दिएपछि आयोगले योजनाबद्ध रूपमा निगरानी गर्दै पक्राउ गरेको हो।
अनुसन्धान जारी
अख्तियारले घटनासँग सम्बन्धित अन्य व्यक्तिको संलग्नता रहेको वा नरहेको विषयमा पनि अनुसन्धान गर्ने जनाएको छ। घटनास्थलबाट बरामद रकम, सम्बन्धित कागजात र अन्य प्रमाणका आधारमा थप अनुसन्धान गरी आवश्यक कानुनी प्रक्रिया अघि बढाइने आयोगले जनाएको छ।
पछिल्ला महिनाहरूमा सार्वजनिक निकाय, स्थानीय तह तथा शैक्षिक संस्थासँग सम्बन्धित घुसका उजुरीमा अख्तियारले ‘स्ट्रिङ अपरेसन’लाई तीव्र बनाउँदै आएको छ।
