काठमाडौं । धवलशमशेर राणा सभापति र दुर्गा प्रसाईं सर्वोच्च नेता रहेको प्रस्तावित ‘जय नेपाल पार्टी’ शुक्रबार निर्वाचन आयोगमा औपचारिक रूपमा दर्ता हुने भएको छ।
पार्टी दर्ताका लागि शुक्रबार मध्याह्न साढे १२ बजे निर्वाचन आयोगले समय दिएको सभापति धवलशमशेर राणाले जानकारी दिएका छन्। पार्टी दर्तासँगै नयाँ राजनीतिक दलका रूपमा ‘जय नेपाल पार्टी’ले औपचारिक राजनीतिक यात्रा सुरु गर्ने तयारी गरेको हो।
राणाका अनुसार पार्टी गठनको प्रक्रिया अघि बढाउँदै संगठन विस्तार तथा देशभरबाट नेता–कार्यकर्तालाई जोड्ने कामसमेत भइरहेको छ। उनले आफू राप्रपाबाट अलग भएर नयाँ राजनीतिक दल गठन गरेको बताएका छन्।
राप्रपाबाट राजीनामा दिएका तथा हाल सोही पार्टीमा रहे पनि असन्तुष्ट रहेका नेता–कार्यकर्ता आफ्नो नयाँ दलमा सहभागी हुने राणाको दाबी छ। उनले पुराना राजनीतिक दलप्रति असन्तुष्ट रहेका तथा वैकल्पिक राजनीतिक शक्ति खोजिरहेका व्यक्तिहरूलाई समेत पार्टीमा समेट्ने संकेत गरेका छन्।
‘जय नेपाल पार्टी’को नेतृत्वमा राणा र प्रसाईं रहने भएपछि यसले नेपालको पछिल्लो राजनीतिक वृत्तमा चासो बढाएको छ। पार्टीले आगामी दिनमा आफ्नो राजनीतिक नीति, संगठनात्मक संरचना र निर्वाचन रणनीतिलाई कसरी अघि बढाउँछ भन्ने विषयलाई समेत चासोका साथ हेरिएको छ।
शुक्रबार निर्वाचन आयोगमा दर्ता भएपछि पार्टीको कानुनी तथा औपचारिक अस्तित्व सुरु हुनेछ। त्यसपछि संगठन विस्तार, सदस्यता अभियान तथा राजनीतिक गतिविधिलाई तीव्रता दिने तयारी रहेको बताइएको छ।
