काठमाडौं । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवा करिब पाँच महिनापछि बिहीबार नेपाल फर्किंदै हुनुहुन्छ । जेनजी आन्दोलनपछि उपचार तथा स्वास्थ्यसम्बन्धी कारणले सिंगापुरमा रहनुभएका देउवा बिहीबार नेपाल फर्किन लाग्नुभएको हो ।
देउवा थाई एयरको विमानमार्फत बिहीबार दिउँसो साढे १२ बजे त्रिभुवन अन्तर्राष्ट्रिय विमानस्थलमा अवतरण गर्ने कार्यक्रम रहेको छ । उहाँको आगमनलाई लिएर नेपाली कांग्रेसका नेता तथा कार्यकर्तामा उत्साह देखिएको छ ।
देउवाको स्वागतका लागि काठमाडौं उपत्यकाका विभिन्न स्थानबाट ठूलो संख्यामा कांग्रेस नेता तथा कार्यकर्ता विमानस्थल क्षेत्रमा पुग्न थालेका छन् । स्वागतमा बाजागाजा, झाँकीसहित करिब ५ देखि ७ हजार नेता तथा कार्यकर्ता सहभागी हुने दाबी गरिएको छ ।
देउवाको स्वागतका लागि विमानस्थल परिसरमा सुरक्षा व्यवस्था समेत कडा पारिएको छ । विमानस्थलमा यात्रु तथा सर्वसाधारणको आवागमनलाई समेत ध्यानमा राख्दै सुरक्षा निकायले आवश्यक तयारी गरेको जनाएको छ ।
पूर्वसभापति देउवालाई स्वागत गर्न विमानस्थल जाने नेता तथा कार्यकर्तालाई विमानस्थलभित्र प्रवेश नगरी बाहिर तोकिएका स्थानमा भेला हुन भनिएको छ । कांग्रेसका अनुसार कार्यकर्ताहरूलाई विमानस्थल प्रवेश गर्ने गेटअगाडिको खाली ठाउँ, नमस्ते गेटअगाडिको खाली ठाउँ र तिलगंगा आँखा अस्पतालअगाडिको खाली ठाउँमा भेला हुन आग्रह गरिएको छ ।
देउवाको स्वागतका क्रममा ठूलो संख्यामा नेता तथा कार्यकर्ता उपस्थित हुने भएकाले विमानस्थल आसपासको क्षेत्रमा सवारी आवागमन प्रभावित हुनसक्ने देखिएको छ । सम्भावित भीड व्यवस्थापन तथा सुरक्षा चुनौतीलाई ध्यानमा राख्दै सुरक्षा निकायले विमानस्थल क्षेत्र आसपास निगरानी बढाएको छ ।
करिब पाँच महिनापछि नेपाल फर्किन लागेका देउवाको आगमनलाई कांग्रेसभित्र राजनीतिक रूपमा समेत महत्त्वका साथ हेरिएको छ । लामो समयदेखि सिंगापुरमा रहेका देउवा स्वदेश फर्किएसँगै पार्टीका नेता तथा कार्यकर्तासँग भेटघाट र समसामयिक राजनीतिक विषयमा छलफल गर्ने तयारीमा रहेको बताइएको छ ।
देउवा नेपाल फर्किएपछि कांग्रेसको आगामी राजनीतिक गतिविधि तथा पार्टीभित्रका विभिन्न विषयमा समेत सक्रियता बढ्ने अपेक्षा गरिएको छ । उहाँको स्वागतका लागि ठूलो संख्यामा कार्यकर्ता परिचालन भएपछि बिहीबार त्रिभुवन अन्तर्राष्ट्रिय विमानस्थल क्षेत्र कांग्रेस कार्यकर्ताले भरिने भएको छ ।
