काठमाडौं । सङ्घीय संसद्, राष्ट्रियसभाको बैठक आज बस्दैछ। सिंहदरबारमा अपराह्न १ः१५ बजे बस्ने बैठकमा ‘आन्तरिक वायुसेवाको दायित्वसम्बन्धी विधेयक, २०८३ माथि विचार गरियोस्’ भन्ने प्रस्ताव पेस हुने सम्भावित कार्यसूची रहेको छ।
संस्कृति, पर्यटन तथा नागरिक उड्डयनमन्त्री खडक राज पौडेल ‘गनेस’ ले उक्त प्रस्ताव राष्ट्रियसभाको बैठकमा पेस गर्ने सम्भावित कार्यसूची रहेको सङ्घीय संसद् सचिवालयले जनाएको छ।
आन्तरिक वायुसेवा सञ्चालनका क्रममा यात्रु तथा सेवाग्राहीप्रति हुने दायित्व, सेवा प्रदायकको जिम्मेवारी तथा सम्बन्धित कानुनी व्यवस्थालाई थप स्पष्ट र व्यवस्थित गर्ने उद्देश्यले विधेयक अघि बढाइएको हो। बैठकमा विधेयकमाथि सैद्धान्तिक छलफल प्रारम्भ हुने अपेक्षा गरिएको छ।
यसैबीच, आज सङ्घीय संसद्अन्तर्गत विभिन्न पाँच वटा संसदीय समितिको बैठकसमेत बस्दैछ। अर्थ समिति, अन्तर्राष्ट्रिय सम्बन्ध तथा पर्यटन समिति, कृषि तथा प्राकृतिक स्रोत समिति, पूर्वाधार विकास समिति र महिला तथा सामाजिक विकास समितिका बैठकका लागि विभिन्न विषयको कार्यसूची तय गरिएको छ।
अर्थ समितिको बैठक
बिहान ९ः३० बजे बस्ने अर्थ समितिको बैठकमा समितिको उपसमितिबाट तयार भएका प्रतिवेदनमाथि छलफल हुने कार्यक्रम रहेको छ। बैठकमा प्रतिवेदनका विषयवस्तु तथा त्यसमा समेटिएका सुझाव र निष्कर्षमाथि समितिका सदस्यहरूले छलफल गर्नेछन्।
अन्तर्राष्ट्रिय सम्बन्ध तथा पर्यटन समिति
बिहान १०ः०० बजे बस्ने अन्तर्राष्ट्रिय सम्बन्ध तथा पर्यटन समितिको बैठकमा ‘अभौतिक सांस्कृतिक सम्पदा (संरक्षण) विधेयक, २०८१’ मा परेको संशोधन प्रस्तावमाथि छलफल हुनेछ।
समितिले विधेयकमाथि संशोधन प्रस्ताव दर्ता गराएका सांसदहरूसँग संशोधनका विषयमा छलफल गर्ने कार्यसूची बनाएको छ। छलफलबाट विधेयकलाई थप प्रभावकारी बनाउन आवश्यक विषय पहिचान गर्ने अपेक्षा गरिएको छ।
कृषि तथा प्राकृतिक स्रोत समिति
कृषि तथा प्राकृतिक स्रोत समितिको बैठक बिहान ११ः०० बजे बस्नेछ। बैठकमा जैविक तथा प्राङ्गारिक मलको प्रयोगको अवस्था, माटोको स्वास्थ्य तथा दिगो कृषि विकासमा यसको सम्भाव्यताका सम्बन्धमा छलफल गरिनेछ।
नेपालको कृषि उत्पादनमा माटोको स्वास्थ्य सुधार, रासायनिक मलमाथिको निर्भरता घटाउने तथा जैविक र प्राङ्गारिक मलको प्रयोगलाई प्रवर्द्धन गर्ने विषयमा समितिमा छलफल हुने जनाइएको छ।
पूर्वाधार विकास समिति
पूर्वाधार विकास समितिको बैठक बिहान १०ः०० बजे बस्दैछ। बैठकमा खानेपानी आपूर्ति कार्ययोजनाको प्रतिवेदनमाथि छलफल गर्ने कार्यसूची रहेको छ।
खानेपानी आपूर्तिको अवस्था, योजनाको कार्यान्वयन तथा नागरिकलाई सहज र नियमित खानेपानी सेवा उपलब्ध गराउन आवश्यक सुधारका विषयमा समितिमा छलफल हुने अपेक्षा गरिएको छ।
महिला तथा सामाजिक विकास समिति
महिला तथा सामाजिक विकास समितिको बैठक बिहान ११ः०० बजे बस्नेछ। बैठकमा ‘राष्ट्रिय दलित आयोगको काम कारबाही तथा प्रगति’ सम्बन्धमा छलफल गर्ने कार्यक्रम रहेको छ।
बैठकमा राष्ट्रिय दलित आयोगले गर्दै आएका काम, हालसम्मको प्रगति, आयोगका चुनौती तथा आगामी कार्यदिशाका विषयमा छलफल हुने जनाइएको छ।
यसरी आज राष्ट्रियसभाको बैठकसँगै पाँचवटा संसदीय समितिका बैठकसमेत बस्ने भएकाले सङ्घीय संसद्मा विधेयक, नीति तथा समसामयिक विषयमा विभिन्न चरणमा छलफल हुने भएको छ।
