काठमाडौं । मधेस प्रदेशमा यस वर्ष धान रोपाइँ सन्तोषजनक रूपमा अघि बढेको छ। प्रदेश कृषि विकास निर्देशनालय धनुषाका अनुसार हालसम्म प्रदेशभर कुल ३ लाख ६५ हजार २९१ दशमलव १५ हेक्टर क्षेत्रफलमा धान रोपाइँ सम्पन्न भएको छ, जुन कुल लक्ष्यको ९५ दशमलव ५१ प्रतिशत हो।
निर्देशनालयका बागबानी अधिकृत किरण विश्वकर्माका अनुसार अनुकूल मौसम, समयमै परेको वर्षा र पर्याप्त सिँचाइ सुविधाका कारण यस वर्ष अधिकांश जिल्लामा रोपाइँ अपेक्षाअनुसार सम्पन्न भएको हो। उनका अनुसार मधेस प्रदेशका आठ जिल्लामध्ये सिरहा र बारामा शतप्रतिशत रोपाइँ सम्पन्न भइसकेको छ।
सिरहामा करिब ५४ हजार हेक्टर क्षेत्रफलमा धानखेती हुने लक्ष्य रहेको छ भने बारामा लक्ष्यभन्दा बढी क्षेत्रफलमा रोपाइँ भएको छ। बारामा ४५ हजार १०० हेक्टर क्षेत्रफलमा रोपाइँ गर्ने लक्ष्य निर्धारण गरिएको भए पनि यस वर्ष ४६ हजार हेक्टर क्षेत्रफलमा धान रोपिएको निर्देशनालयले जनाएको छ। यसलाई कृषकको उत्साह, पर्याप्त पानीको उपलब्धता तथा अनुकूल मौसमको सकारात्मक परिणामका रूपमा हेरिएको छ।
अन्य जिल्लाको अवस्था पनि उत्साहजनक रहेको छ। सप्तरीमा ९१ दशमलव २५ प्रतिशत, धनुषामा ९० प्रतिशत, सर्लाहीमा ९९ प्रतिशत, रौतहटमा ९८ प्रतिशत, पर्सामा ९१ प्रतिशत तथा महोत्तरीमा ८१ दशमलव ६८ प्रतिशत रोपाइँ सम्पन्न भएको छ।
धनुषामा यस वर्ष ४३ हजार ९०० हेक्टर क्षेत्रफलमा धानखेती गर्ने लक्ष्य राखिएको थियो। तीमध्ये हालसम्म ३९ हजार ३३० हेक्टर क्षेत्रफलमा रोपाइँ सम्पन्न भएको कृषि विकास निर्देशनालयले जनाएको छ। महोत्तरीमा भने अन्य जिल्लाको तुलनामा रोपाइँ केही सुस्त देखिए पनि बाँकी क्षेत्रफलमा रोपाइँ अन्तिम चरणमा पुगेको अधिकारीहरूको भनाइ छ।
प्रदेशभर यस वर्ष कुल ३ लाख ८२ हजार ४३३ हेक्टर क्षेत्रफलमा धानखेती हुने अनुमान गरिएको छ। हालसम्मको प्रगति हेर्दा केही दिनभित्र बाँकी क्षेत्रफलमा पनि रोपाइँ सम्पन्न हुने अपेक्षा गरिएको निर्देशनालयले जनाएको छ।
कृषि विज्ञहरूका अनुसार समयमै सम्पन्न भएको धान रोपाइँले उत्पादन वृद्धि हुने सम्भावना बढाएको छ। पर्याप्त वर्षा, सिँचाइ सुविधा र कृषकको सक्रियताका कारण यस वर्ष मधेस प्रदेशमा धान उत्पादन गत वर्षको तुलनामा राम्रो हुने अनुमान गरिएको छ। प्रदेश सरकार र कृषि कार्यालयहरूले किसानलाई मल, बीउ, प्राविधिक परामर्श तथा सिँचाइ व्यवस्थापनमा निरन्तर सहयोग गरिरहेकाले उत्पादन बढ्ने अपेक्षा गरिएको छ।
धान मधेस प्रदेशको प्रमुख खाद्यान्न बाली भएकाले यसको उत्पादनले प्रदेशको कृषि अर्थतन्त्र, किसानको आम्दानी र राष्ट्रिय खाद्य सुरक्षामा महत्वपूर्ण योगदान पुर्याउने विश्वास गरिएको छ। कृषि विकास निर्देशनालयले बाँकी क्षेत्रफलमा पनि मौसम अनुकूल रहे केही दिनमै शतप्रतिशत रोपाइँ सम्पन्न हुने जनाएको छ।
