काठमाडौं । महिला दिदीबहिनीहरूको महान् पर्व हरितालिका तीज नजिकिँदै जाँदा तीज गीतहरूको रौनक पनि बढ्दै गएको छ। यही अवसरलाई लक्षित गर्दै सर्जक बिनोद ढकालले नयाँ तीज गीत ‘झुम्का कस्तो छ’ सार्वजनिक गरेका छन्। सार्वजनिक भएको केही समयमै गीतले दर्शक–श्रोतामाझ सकारात्मक प्रतिक्रिया बटुल्न थालेको छ।
‘झुम्का कस्तो छ’ गीतमा बिनोद ढकालकै शब्द तथा संगीत रहेको छ। गीतमा चर्चित गायिकाद्वय सीमा नेपाली र रिया सुनारको सुमधुर स्वर सुन्न सकिन्छ। गीतको संगीत संयोजन कृष्ण लामिछानेले गरेका हुन् भने मिक्सिङ हेमराज डाँगीले गरेका छन्।
गीतसँगै सार्वजनिक गरिएको म्युजिक भिडियोको निर्देशन दिनेशसिंह ठकुरीले गरेका छन्। भिडियोमा प्रेम दर्नालको आकर्षक कोरियोग्राफी रहेको छ भने छायाङ्कन सरोज ठकुरी र सम्पादन राजेश कुँवरले गरेका छन्।
भिडियोमा जुना कार्की, बिनोद ढकाल र जुनु रिमालको अभिनय रहेको छ। तीजको सांस्कृतिक माहोल, नृत्य, मौलिक पहिरन र मनोरञ्जनलाई समेटिएको भिडियोले दर्शकको ध्यान आकर्षित गरेको छ।
‘झुम्का कस्तो छ’ सर्जक बिनोद ढकालको आधिकारिक युट्युब च्यानलमार्फत सार्वजनिक गरिएको हो। अडियो–भिडियोको निर्माण तथा व्यवस्थापन भिडियो बैंकले गरेको छ।
लामो समयदेखि नेपाली सांगीतिक क्षेत्रमा सक्रिय बिनोद ढकालका विभिन्न लोक तथा तीज गीतहरू यसअघि पनि लोकप्रिय भइसकेका छन्। यस वर्षको तीजलाई लक्षित गरेर ल्याइएको ‘झुम्का कस्तो छ’ले पनि तीज गीतहरूको सूचीमा विशेष स्थान बनाउने अपेक्षा गरिएको छ। गीतको मौलिकता, शब्द, संगीत तथा कलाकारहरूको प्रस्तुतीका कारण यसले दर्शक तथा श्रोताबाट उत्साहजनक प्रतिक्रिया प्राप्त गरिरहेको छ।
