एजेन्सी। अमेरिकी राष्ट्रपति डोनाल्ड ट्रम्पले जन्मका आधारमा स्वतः अमेरिकी नागरिकता प्राप्त गर्ने व्यवस्थालाई थप सीमित गर्ने उद्देश्यले दुई वटा नयाँ कार्यकारी आदेश जारी गर्नुभएको छ ।
अमेरिकी सर्वोच्च अदालतले यसअघिको प्रयासलाई अस्वीकार गरेपछि राष्ट्रपति ट्रम्पले नयाँ व्यवस्था अघि सार्नुभएको बीबीसीले जनाएको हाे। नयाँ व्यवस्थाअनुसार विदेशी आतंककारी समूहसँग आबद्ध व्यक्ति, विदेशी सरकारका कर्मचारी, नागरिकता प्राप्त गर्न छलकपट गरेको आरोप लागेका व्यक्ति तथा कानूनले नागरिकताको अधिकार नदिने अमेरिकी भू-भागका नागरिकका सन्तानले अमेरिकामा जन्मिए पनि अब स्वतः अमेरिकी नागरिकता प्राप्त गर्ने छैनन् ।
त्यसैगरी, गर्भवतीहरूले आफ्ना सन्तानलाई अमेरिकी नागरिक बनाउने उद्देश्यले अमेरिका पुगेर प्रसूति गराउने प्रवृत्तिलाई पनि नयाँ आदेशमार्फत रोक लगाइएको हाे । आदेश सार्वजनिक गर्दै राष्ट्रपति ट्रम्पले यस्तो व्यवस्था धेरै पहिले नै लागू हुनुपर्ने बताउँदै अब त्यसलाई कार्यान्वयनमा ल्याइएको बताउनुभएको छ । उहाँले यसअघि अमेरिकी सर्वोच्च अदालतले गरेको निर्णयप्रति असन्तुष्टि जनाउँदै त्यसको अर्को कानूनी उपाय खोजिएको समेत बताउनुभयो ।
ह्वाइट हाउसका नीति प्रमुख स्टेफन मिलरले पर्यटक वा आगन्तुकको रूपमा अमेरिका प्रवेश गरेर सन्तान जन्माउने उद्देश्य राख्नेहरूले अमेरिकी नागरिकताको सुविधाको दुरुपयोग गरिरहेको आरोप लगाउनुभएकाे छ । उहाँले यस्ता सन्तानले पछि अमेरिकी नागरिकका रूपमा विभिन्न अधिकार र सरकारी सुविधा प्राप्त गर्ने गरेकाे समेत बताउनुभयाे ।
यद्यपि, स्वतन्त्र अनुसन्धान संस्था आप्रवासन नीति प्रतिष्ठानका अनुसार यस्तो उद्देश्यले अमेरिका पुगेर जन्मिने शिशुको सङ्ख्या प्रशासनले दावी गरे जति धेरै छैन । संस्थाको अनुमान अनुसार हरेक वर्ष करिब २२ हजारदेखि २६ हजार शिशु यसरी जन्मिने गरेका छन् । सरकारी तथ्यांक अनुसार सन् २०२४ मा विदेशी ठेगाना भएका आमाबाट ९ हजार ६ सय शिशुको जन्म भएको थियो ।
राष्ट्रपति ट्रम्पले यसअघि अमेरिकी संविधानको चौधौं संशोधनद्वारा सुनिश्चित जन्मसिद्ध नागरिकताको व्यवस्था अन्त्य गर्ने प्रयास गर्नुभएको थियो । तर अमेरिकी सर्वोच्च अदालतले त्यो प्रयासलाई अस्वीकार गर्दै जन्मसिद्ध नागरिकताको व्यवस्था यथावत् रहने फैसला सुनाएको थियो । नयाँ आदेशहरूले पनि कानूनी परीक्षणको सामना गर्ने अपेक्षा गरिएको छ ।
